ಮಕ್ಕಳಿಂದ ಅರಳಿದ ಕಲೆ


(ಚಿತ್ರಗಳನ್ನು ದೊಡ್ಡದಾಗಿಸಲು ಅದರ ಮೇಲೆ ಕ್ಲಿಕ್ಕಿಸಿ)


"ವಿಕಾಸ ವಿದ್ಯಾ ಸಂಸ್ಥೆ" ಶಿವಮೊಗ್ಗದ ಪ್ರತಿಷ್ಟಿತ ಶಾಲೆಗಳಲ್ಲಿ ಒಂದು. ಈ ಶಾಲೆಯು ಮಕ್ಕಳನ್ನು ಓದು ಬರಹಕ್ಕೆ ಮಾತ್ರ ಸೀಮಿತಗೊಳಿಸದೆ ಅವರಲ್ಲಿರುವ ಕಲಾಪ್ರತಿಭೆಯನ್ನು ಗುರುತಿಸಿ ಪ್ರೋತ್ಸಾಹಿಸುತ್ತಿದೆ.ಪ್ರತಿ ವರ್ಷವೂ ವಾರ್ಷಿಕೋತ್ಸವಕ್ಕೆ ಮುನ್ನ ಮೂರು ದಿನಗಳ ಕಾಲ ವಿಜ್ಞಾನ ಮತ್ತು ಕಲಾ ವಸ್ತುಪ್ರದರ್ಶನವನ್ನು ಭರ್ಜರಿಯಾಗಿ ನಡೆಸಿ, ಮಕ್ಕಳಲ್ಲಿರುವ ಪ್ರತಿಭೆಯನ್ನು ಹೊರಗೆಳೆಯುವ ಮೂಲಕ ನಮ್ಮ ಕಲೆಗಳನ್ನು ಉಳಿಸಿ ಬೆಳಸುವ ನಿಟ್ಟಿನಲ್ಲಿ ಹೆಜ್ಜೆಯಿಡುತ್ತಿದೆ.

ನನಗೆ ಈ ಶಾಲೆಯ ವಸ್ತುಪ್ರದರ್ಶನವನ್ನು ನೋಡುವ ಅವಕಾಶ ಈ ವರ್ಷ ಒದಗಿ ಬಂತು.ಅಲ್ಲಿನ ವಿದ್ಯಾರ್ಥಿಗಳು ವಿಜ್ಞಾನಕ್ಕೆ ಸಂಬಂಧಿಸಿದ ಅನೇಕ ವಿನ್ಯಾಸಗಳನ್ನು,ತಮಗೆ ಲಭ್ಯವಾದ ವಸ್ತುಗಳನ್ನು ಉಪಯೋಗಿಸಿ ಅಚ್ಚುಕಟ್ಟಾಗಿ ತಯಾರು ಮಾಡಿದ್ದರು.
ಬೆಂಡಿನಿಂದ ತಯಾರಿಸಿದ ವಿವಿಧ ಮಾದರಿಗಳ ವಿಭಾಗವು ನನ್ನ ಮನಸೆಳೆಯಿತು.ಬೆಳವಾಡಿಯ ವೀರನಾರಾಯಣ ದೇವಸ್ಥಾನ, ಖುಜುರಾಹೋ ದೇವಸ್ಥಾನ, ತಾಜ್ ಮಹಲ್ಲುಗಳೊಂದಿಗೆ ವಿದೇಶದಲ್ಲಿರುವ ಚರ್ಚುಗಳು ಮತ್ತು ಸ್ಟೇಡಿಯಂ ಹಾಗು ಇನ್ನೂ ಅನೇಕ ಸುಂದರ ವಿನ್ಯಾಸಗಳು ಅಲ್ಲಿದ್ದವು.ಇವುಗಳನ್ನು ಅಲ್ಲಿನ ಮಕ್ಕಳು ನುರಿತ ಕಲಾವಿದರ ಮಾರ್ಗದರ್ಶನದಲ್ಲಿ ತಾವೇ ಸ್ವತಃ ಮಾಡಿದ್ದರು.ಅದರ ಕೆಲವು ಚಿತ್ರಗಳು ಇಲ್ಲಿದೆ.










ಆ ಶಾಲೆಯ ಮಕ್ಕಳು ಮತ್ತು ಶಿಕ್ಷಕ ವೃಂದಕ್ಕೆ ನನ್ನ ಅಭಿನಂದನೆ.    

ವಿದೇಶ ವಿಹಾರ - 5 ಆಸ್ಟ್ರೇಲಿಯಾದಲ್ಲಿ ನಾ ಕಂಡದ್ದು..ಕೇಳಿದ್ದು..


ಗಾಜಿನ ಬಾಗಿಲುಗಳು (Glass Doors)
ಈ ದೇಶದಲ್ಲಿ ದೊಡ್ಡ ಶಾಪ್ ಗಳಿರಲಿ,ಸರ್ಕಾರಿ ಕಛೇರಿಗಳಿರಲಿ,ಯಾವುದೇ ಕಟ್ಟಡಗಳಿಗೂ ನಮ್ಮಲ್ಲಿರುವಂತೆ ಮರದ ಅಥವಾ ಕಬ್ಬಿಣದ ಬಾಗಿಲುಗಳಿರುವುದಿಲ್ಲ.ಉದ್ದುದ್ದವಾದ ಮೂರ್ನಾಲ್ಕು ಗ್ಲಾಸಿನ ಬಾಗಿಲುಗಳಿರುತ್ತವೆ.ಮನೆಗಳಿಗೆ ಮಾತ್ರ ಹೊರಗಿನಿಂದ ಮೆಶ್ ಡೋರಿರುತ್ತದೆ ಅಷ್ಟೆ.ಆದರೆ ದೊಡ್ಡ ದೊಡ್ಡ ಅಂಗಡಿಗಳಿಗೆ ಮೆಶ್ ಡೋರ್ ಸಹ ಇರುವುದಿಲ್ಲ. ರಾತ್ರಿ ವೇಳೆ ಗಾಜಿನ ಬಾಗಿಲುಗಳನ್ನು ಮುಚ್ಚಿ ಬೀಗ ಹಾಕಿದರೆ ಮುಗಿಯಿತು.

 ರಸ್ತೆಯಲ್ಲಿ ಓಡಾಡುವ ನಮಗೆ ಒಳಗೆ ಜೋಡಿಸಿಟ್ಟಿರುವ ಎಲ್ಲಾ ವಸ್ತುಗಳು ಕಾಣುತ್ತಿರುತ್ತವೆ. ಸಂಜೆ ಏಳಕ್ಕೆ ಅಲ್ಲಿನ ಅಂಗಡಿಗಳೆಲ್ಲ ಬಂದಾಗಿರುತ್ತವೆ.ಬರೀ ಗಾಜಿನ ಬಾಗಿಲುಗಳನ್ನು ಹಾಕಿರುವುದನ್ನು ನೋಡಿ ನನಗಂತೂ ಬಹಳ ಆಶ್ಚರ್ಯವಾಯಿತು.ನನ್ನ ಮಗಳ ಮನೆಯಲ್ಲಿಯೂ ಇದೇ ರೀತಿಯ ದೊಡ್ಡ ದೊಡ್ಡ ಗಾಜಿನ ಬಾಗಿಲುಗಳಿವೆ.ರ‍ಾತ್ರಿ ವೇಳೆ  ಗ್ಲಾಸಿನ ಮತ್ತು ಮೆಶ್ ಡೋರುಗಳನ್ನು ಲಾಕ್ ಮಾಡಿ ಕರ್ಟನ್ ಎಳೆದರೆ ಮುಗಿಯಿತು.ಕಳ್ಳತನದ ಭಯವಿಲ್ಲ.  ಅಲ್ಲದೆ ಇಲ್ಲಿನ ಎಲ್ಲಾ ಮನೆಗಳಲ್ಲಿ ಮತ್ತು ಇತರ ಎಲ್ಲಾ ಕಟ್ಟಡಗಳಲ್ಲಿ ಅಲಾರಾಂ ಮತ್ತು ಸಿ ಸಿ ಕ್ಯಾಮರದ ವ್ಯವಸ್ಥೆಯೂ ಇರುತ್ತದೆ.
ಬಾಳೆ ಮತ್ತು ಕಬ್ಬಿನ ಕೃಷಿ


ಟೌನ್ಸ್ವಿಲ್ ನಿಂದ ಕೈರ್ನ್ಸ್ ಗೆ ಹೋಗುವ ಮಾರ್ಗದಲ್ಲಿ ಬಾಳೆಯ ತೋಟ ನಮ್ಮನ್ನು ಸೆಳೆಯಿತು. ಗೊನೆಗಳಿಗೆ ಪ್ಲಾಸ್ಟಿಕ್ಕಿನ ಚೀಲದಿಂದ ಮುಚ್ಚಿರುವುದನ್ನು ನೋಡಬಹುದು.ಮತ್ತೊಂದು ಸಂಗತಿಯೆಂದರೆ ಇಲ್ಲಿ ಸೇಬನ್ನು ಕಡಿಮೆ ಡಾಲರಿಗೆ ಕೊಳ್ಳಬಹುದು. ಆದರೆ ಒಂದು ಬಾಳೆಹಣ್ಣಿನ ಬೆಲೆ ಮೂರರಿಂದ ಮೂರೂವರೆ ಡಾಲರ್... ! ಅಂದರೆ ಬರೋಬ್ಬರಿ ನೂರೈವತ್ತರಿಂದ ನೂರ ಎಪ್ಪತೈದು ರೂಪಾಯಿಗಳು..!!
ಇತ್ತೀಚೆಗೆ ಬೀಸಿದ "ಯಾಸಿ" ಚಂಡಮಾರುತಕ್ಕೆ ಅಲ್ಲಿನ ಬಾಳೆತೋಟಗಳಿಗೆ ಹೆಚ್ಚಿನ ಹಾನಿಯಾಗಿರುವುದರಿಂದ ಬಾಳೇಹಣ್ಣಿನ ಬೆಲೆ ಹೆಚ್ಚಾಗಲು ಕಾರಣವಾಗಿದೆ.


ಕೃಷಿ ಮತ್ತು ಪ್ರವಾಸೋದ್ಯಮದ ಮೇಲೆ ಅಸ್ಟ್ರೇಲಿಯಾದ ರಾಜ್ಯ ಕ್ವೀನ್ಸ್ ಲ್ಯಾಂಡಿನ ಆರ್ಥಿಕತೆ ನಿಂತಿದೆ. ಇಲ್ಲಿ ಕಬ್ಬು ಪ್ರಮುಖ ಬೆಳೆ.

ಕಬ್ಬನ್ನು ಬೆಳೆದು ಸಕ್ಕರೆ ಕಾರ್ಖಾನೆಗಳಿಗೆ ಸಾಗಿಸುತ್ತಾರ‍ೆ.ಇದು ಕಬ್ಬನ್ನು ಕಾರ್ಖಾನೆಗೆ ಸಾಗಿಸುವ ರೈಲು.ಬೆಳೆದು ನಿಂತ ಕಬ್ಬನ್ನು ಸಾಗಿಸಲು ಅಲ್ಲಿನವರು ನಮ್ಮಂತೆ ಕಷ್ಟಪಡಬೇಕಿಲ್ಲ. ಕಬ್ಬಿನ ಜಲ್ಲೆಯನ್ನು ಸಣ್ಣ ತುಂಡು ಮಾಡಿ ಈ ರೈಲಿನ ತೊಟ್ಟಿಗಳಲ್ಲಿ ತುಂಬಿಸಲು ಯಂತ್ರವನ್ನು ಬಳಸುತ್ತಾರೆ.ಎಲ್ಲಾ ಬೋಗಿಗಳು ತುಂಬಿದ ನಂತರ ಸ್ವಯಂಚಾಲಿತ ರೈಲು ಅದನ್ನು ಕಾರ್ಖಾನೆಗೆ ತಲುಪಿಸುತ್ತದೆ.

"ನಾವಿಗೇಟರ್ "GPS CAR NAVIGATION SYSTEMS

ಅಲ್ಲಿನ ಅತ್ಯಾಧುನಿಕವಾದ ಮತ್ತು ಕಂಪ್ಯೂಟರೀಕೃತವಾದ ಕಾರುಗಳಲ್ಲಿ "ನಾವಿಗೇಟರ್ "ಅನ್ನು ಅಳವಡಿಸಿರುತ್ತಾರೆ.ಇದರ ಸಹಾಯದಿಂದ ಆ ದೇಶದ ಯಾವ ಸ್ಥಳಕ್ಕಾದರೂ ಯಾರ ಮಾರ್ಗದರ್ಶನವಿಲ್ಲದೆ ಹೋಗಬಹುದು.ನಮ್ಮ ಮನೆಯಿಂದ ಹೊರಡುವಾಗ ನಾವು ತಲುಪಬೇಕಾದ ಸ್ಥಳದ ವಿಳಾಸವನ್ನು ಇದರಲ್ಲಿ ಹಾಕಿದರೆ ಸಾಕು. ನಮಗೆ ಅದೇ ಮಾರ್ಗವನ್ನು ತಿಳಿಸುತ್ತಾ ಹೋಗುತ್ತದೆ. ಸರ್ಕಲ್ಲುಗಳು ಬಂದಾಗ ನಾವು ಯಾವ ಕಡೆ ತಿರುಗಿಸಬೇಕು ,ನಾವು ನಮ್ಮ ಗಮ್ಯವನ್ನು ತಲುಪಲು ಇನ್ನೆಷ್ಟು ದೂರ ಪ್ರಯಾಣಿಸಬೇಕು ಎಂಬುದನ್ನೆಲ್ಲಾ ತಿಳಿಸುತ್ತಿರುತ್ತದೆ.ಕೊನೆಗೆ ನಾವು ತಲುಪ ಬೇಕಾದ ತಾಣಕ್ಕೆ ನಮ್ಮನ್ನು ಕರೆದುಕೊಂಡು ಹೋಗಿ ನಿಲ್ಲಿಸುತ್ತದೆ.ಇದನ್ನು ಕಂಡು ನಮಗೆ ತುಂಬಾ ಅಚ್ಚರಿಯಾಯಿತು.
ಟೌನ್ಸ್ವಿಲ್ ನಲ್ಲಿ ಫ್ಲೈಟ್ ಇಳಿದಾಗ ನಮ್ಮನ್ನು ಕರೆದುಕೊಂಡು ಹೋಗಲು ತಮ್ಮ BMW ಕಾರಿನಲ್ಲಿ ಬಂದಿದ್ದ ನಮ್ಮ ಅಳಿಯ ನಾವಿಗೇಟರ‍್ ನ ಉಪಯೋಗವನ್ನು ನಮಗೆ ತಿಳಿಸಿ ಕೊಟ್ಟರು. ಜನರೇ ಕಾಣದ ಈ ಊರುಗಳಲ್ಲಿ ಇದು ತುಂಬಾ ಪ್ರಯೋಜನಕಾರಿ.

POST OFFICE
  

ಆಸ್ಟ್ರೇಲಿಯಾ ದೇಶದ ಪೋಸ್ಟ್ ಆಫೀಸು.ನಮ್ಮ ದೇಶದಲ್ಲಿ ಪೋಸ್ಟ್ ಆಫೀಸ್ ಹಿಂದೆ ನಮ್ಮ ಬಿ ಎಸ್ ಎನ್ ಎಲ್ ನ ಸೋದರ ಸಂಸ್ಥೆಯಾಗಿತ್ತು ಎಂಬ ಭಾವ ನನ್ನ ಕ್ಯಾಮರ ಇದರತ್ತ ಹೊರಳಲು ಕಾರಣವಿರಬಹುದು.








ಟೆಲಿಪೋನ್ ಬೂತುಗಳು-CCB



ನಾನು ಬಿ ಎಸ್ ಎನ್ ಎಲ್ ಉದ್ಯೋಗಿ. ಹಾಗಾಗಿ ಯಾವ ಪ್ರದೇಶಕ್ಕೆ ಹೋದರೂ ಅಲ್ಲಿನ ಟೆಲಿಪೋನ್ ಎಕ್ಸ್ಚೇಂಜುಗಳು, ಬೂತುಗಳು ನನ್ನ ಗಮನ ಸೆಳೆಯುತ್ತದೆ. ಅಂಥಾದ್ದರಲ್ಲಿ ವಿದೇಶದಲ್ಲಿ ಟೆಲಿಕಾಂ ಕಂಪನಿಗಳು,ಬೂತುಗಳು ನನ್ನ ಕಣ್ಣಿಂದ ತಪ್ಪಿಸಿಕೊಳ್ಳಲು ಸಾಧ್ಯವೆ?



 AUSTRELIAN TELECOMMUNICATION COMPANY



’ಟೆಲ್ ಸ್ಟ್ರಾ’ ಆಸ್ಟ್ರೇಲಿಯಾದ ಅತಿ ದೊಡ್ಡ ಸರ್ಕಾರಿ ಒಡೆತನದ ಟೆಲಿಕಾಂ ಸಂಸ್ಥೆ.ಹಾಗಾಗಿ ಆಸ್ಟ್ರೇಲಿಯಾದ ಯಾವ ಪ್ರದೇಶಕ್ಕೆ ಹೋದರೂ ಈ ಕಂಪನಿಯ ಬೂತುಗಳನ್ನು ಕಾಣಬಹುದು.ನನ್ನ ಮಗಳು ಟೌನ್ಸ್ವಿಲ್ ನಲ್ಲಿ ಇದೇ ಕಂಪನಿಯಲ್ಲಿ ಉದ್ಯೋಗಿ. ಈ ಬೂತುಗಳು ನನ್ನ ಮನಸೆಳೆಯಲು ಇವಿಷ್ಟು ವಿಚಾರಗಳು ಸಾಕೆನಿಸುತ್ತದೆ.
     
ನಮ್ಮ ತ್ರಿವರ್ಣಧ್ವಜ


ಕೈರ್ನ್ಸ್ ಗೆ ಹೋಗುವ ದಾರಿಯಲ್ಲಿ ಜೂಸ್ ಕುಡಿಯಲು ಒಂದು ರೆಸ್ಟೋರೆಂಟಿನ ಬಳಿ ಹೋದಾಗ ನೋಡಿದ ದೃಶ್ಯ.ಬೇರೆ ದೇಶದ ಬಾವುಟಗಳ ಜೊತೆ ನಮ್ಮ ಧ್ವಜವೂ ಹೆಮ್ಮೆಯಿಂದ ಹಾರಾಡುತ್ತಾ ನಮಗೆ ಸ್ವಾಗತ ಕೋರುತ್ತಿತ್ತು.ಪರದೇಶದಲ್ಲಿದ್ದಾಗ ನಮ್ಮ ದೇಶದ ಜನರನ್ನು ಕಂಡರೇ ಅರಳುವ ನಮ್ಮ ಮನ, ನಮ್ಮ ತ್ರಿವರ್ಣ ಧ್ವಜ ಹಾರುತ್ತಿರುವುದನ್ನು ನೋಡಿ ಹೆಮ್ಮೆಯಿಂದ ಬೀಗಿತು.          

ವಿದೇಶ ವಿಹಾರ - 4 ಆಸ್ಟ್ರೇಲಿಯಾದಲ್ಲಿ ನಾ ಕಂಡದ್ದು..ಕೇಳಿದ್ದು..


ಶಾಂತ ಸಾಗರ - ಪ್ರಶಾಂತ ಸಾಗರ..!!!!

ನಾನು ಹಿಂದೂ ಮಹಾ ಸಾಗರವನ್ನು ನಮ್ಮ ದೇಶದ ತೀರ ಪ್ರದೇಶಗಳಲ್ಲಿ ಕಂಡು ಸಾಗರದ ನೀರಿನಲ್ಲಿ ಆಟವಾಡಿ ಆನಂದಿಸಿದ್ದೇನೆ. ಸಾಗರದ ಅಲೆಗಳ ಅಬ್ಬರ, ಸಮುದ್ರದ ಭೋರ್ಗರೆತವನ್ನು ಕಂಡು ಮಹಾಸಾಗರಗಳೆಂದರೆ ಹೀಗೇ ಎಂದು ಅಂದುಕೊಡಿದ್ದೇನೆ. ಆಳೆತ್ತರಕ್ಕೆ ನೆಗೆಯುತ್ತಾ ಒಂದರ ಹಿಂದೊಂದು ಬರುವ ಅಲೆಗಳು ತನ್ನೊಡಲಿಗೆ ಸಿಕ್ಕ ವಸ್ತುಗಳನ್ನು ದಡಕ್ಕೆ ಎಸೆದು,ದಡದಲ್ಲಿ ಇದ್ದವುಗಳನ್ನು ತನ್ನ ತೋಳುಗಳನ್ನು ಚಾಚಿ ಸೆಳೆದುಕೊಳ್ಳುತ್ತಾ ವಾಪಾಸಾಗುವ ತರಂಗಗಳನ್ನು ದಿನವಿಡೀ ನೋಡಿ ಮೈಮರೆತಿದ್ದೇನೆ.

ಸಮುದ್ರದ ಸೌಂದರ್ಯವನ್ನು ಸವಿಯಬೇಕೆಂದರೆ ಕನ್ಯಾಕುಮಾರಿಯ ವಿವೇಕಾನಂದ ಮೆಮೊರಿಯಲ್ ರಾಕ್ ಗೆ ಹೋಗಬೇಕು.ಭಾರತದ ಭೂಶಿರ ಕನ್ಯಾಕುಮಾರಿಯಲ್ಲಿ ಹಿಂದೂ ಮಹಾಸಾಗರದ ಅಲೆಗಳ ಆರ್ಭಟ ಮತ್ತು ನಾವು ಮಾತಾಡಿದರೂ ಪಕ್ಕದವರಿಗೆ ಕೇಳಿಸದಷ್ಟು ಭೋರ್ಗರೆತದ ಪರಾಕಾಷ್ಟೆಯನ್ನು ಕಂಡು ಆನಂದಿಸಿದರೂ ಒಳಗೊಳಗೆ ಸಣ್ಣಗೆ ನಡುಗಿದ್ದೂ ಇದೆ.


ಪ್ರಪಂಚದಲ್ಲಿಯೇ ಅತ್ಯಂತ ವಿಶಾಲವಾದ ಸಾಗರವೆಂದರೆ ಪೆಸಿಫಿಕ್ ಸಾಗರ. ಆಸ್ಟ್ರೇಲಿಯಾದ ಪೂರ್ವಕ್ಕೆ ವಿಸ್ತಾರವಾದ ಪೆಸಿಫಿಕ್ ಸಾಗರವಿದೆ.ಆದರೆ ಪೆಸಿಫಿಕ್ ಸಾಗರದ ಅನುಭವವೇ ಬೇರೆ.ಆಸ್ಟ್ರೇಲಿಯಾ ಪ್ರವಾಸದ ವೇಳೆ ಈ ಸಾಗರದ ತೀರ ಪ್ರದೇಶಗಳನ್ನು ಮತ್ತು ಈ ಸಾಗರದಲ್ಲಿರುವ ದ್ವೀಪಗಳಿಗೆ ಭೇಟಿ ನೀಡುವ ಅವಕಾಶ ಒದಗಿತು.ನನ್ನ ಮಗಳಿರುವ ಸಿಟಿ ಟೌನ್ಸ್ವಿಲ್ ನಲ್ಲಿ ಸಹ ಪೆಸಿಫಿಕ್ ಸಾಗರವನ್ನು ಕಾಣಬಹುದು. ಇಲ್ಲಿ ಪೊಲ್ಲರಾಂಡ  ಮತ್ತು ಸ್ಟ್ರ್ಯಾಂಡ್ ಬೀಚುಗಳಿವೆ. ಕೈರ್ನ್ಸ್ ಪ್ರದೇಶದ ಸುತ್ತಾಮುತ್ತಾ ಅನೇಕ ಬೀಚುಗಳಿಗೆ ಹೋಗಿದ್ದೆವು.

ಪೆಸಿಫಿಕ್ ಸಾಗರದಲ್ಲಿ ಎಲ್ಲಿಯೂ ಅಲೆಗಳ ಆರ್ಭಟವಾಗಲಿ, ಮೈ ನಡುಗಿಸುವ ಭೋರ್ಗರೆತವಾಗಲಿ ನನ್ನ ಅನುಭವಕ್ಕೆ ಬರಲೇ ಇಲ್ಲ.ಯಾವುದೇ ಭಯವಿಲ್ಲದೆ ಸಮುದ್ರದ ನೀರಿನಲ್ಲಿ ಅಲೆಗಳೊಂದಿಗೆ ಆಟವಾಡುತ್ತಾ ಕಾಲಕಳೆಯಬಹುದು.ದೊಡ್ಡ ಕಡಲೂ ಸಹ ಮೇಲ್ನೋಟಕ್ಕೆ ಪ್ರಶಾಂತವಾಗಿರಬಲ್ಲುದು ಎಂಬುದು ಈಗ ನನ್ನ ಅರಿವಿಗೆ ಬಂತು.ಇದು ಹೆಸರಿಗೆ ತಕ್ಕಂತೆ "ಶಾಂತ ಸಾಗರ" ವೇ ಸರಿ.

ಸಮುದ್ರ ರಾಜನ ಮತ್ತೊಂದು ಅವತಾರವನ್ನು ವೀಕ್ಷಿಸಿ ಮನ ಮೂಕವಿಸ್ಮಿತವಾಯಿತು.ನಮ್ಮ ಕಲ್ಪನೆಗೆ ಎಟುಕದ ವೈವಿಧ್ಯತೆಯನ್ನು ತುಂಬಿ ಬ್ರಹ್ಮಾಂಡವನ್ನು ಸೃಷ್ಠಿಸಿದ ಕಾಣದ ಆ ಶಕ್ತಿಗೆ ಮನ ನಮೋ ಎಂದಿತು.

ಸಾಗರದ ಮೇಲಿಂದ ಬೀಸುವ ಗಾಳಿಗೆ ಉಂಟಾದ ಮರಳಿನ ಚಿತ್ತಾರ.


ಕೈರ್ನ್ಸ್ ನಿಂದ ಹದಿನೈದು ಕಿಲೋಮೀಟರ್ ಹೋದರೆ ಅನೇಕ ಬೀಚ್ ಗಳನ್ನು ನೋಡಬಹುದು. ಈ ಶಾಂತ ಸಾಗರದ ತೀರ ಪ್ರದೇಶವನ್ನು ಗಮನಿಸಿ.ಅಲೆಗಳ ಅಬ್ಬರವಿಲ್ಲ. ಗುಡ್ಡಬೆಟ್ಟಗಳಿಂದ ಸುತ್ತುವರೆದಿರುವ ಸಮುದ್ರ.ಕಡಲ ತಡಿಯಲ್ಲಿ ಗಾಳಿ,ನೀರಿನ ಹೊಡೆತಕ್ಕೆ ಸವೆದು ಸೊಗಸಾದ ಆಕಾರಗಳನ್ನು ಪಡೆದ ಕಲ್ಲುಗಳ ರಾಶಿಯೇ ಇಲ್ಲಿದೆ.ನಾವು ಕಲ್ಲುಗಳ ವಿವಿಧ ಆಕೃತಿಗೆ ಮನಸೋತು ಎಂಟು-ಹತ್ತು ಕಲ್ಲುಗಳನ್ನು ನಮ್ಮ ಕಾರಿನಲ್ಲಿ ಹಾಕಿಕೊಂಡು ಬಂದು ನನ್ನ ಮಗಳ ಮನೆಯ ಮುಂದಿನ ಲಾನಿನಲ್ಲಿ ಇಟ್ಟೆವು. ಭಾರತಕ್ಕೆ ತರುವಂತಿದ್ದರೆ ಇಲ್ಲಿಗೂ ತಂದೇ ಬಿಡುತ್ತಿದ್ದೆವೇನೋ ಅನ್ನಿಸಿತು.

ವಿದೇಶ ವಿಹಾರ - 3 - ಆಸ್ಟ್ರೇಲಿಯಾದಲ್ಲಿ ನಾ ಕಂಡದ್ದು..ಕೇಳಿದ್ದು..

ರಸ್ತೆಗಳಲ್ಲಿ  ಚಲಿಸುವ  ಮನೆಗಳು (Moving House)
(ಫೋಟೋಗಳನ್ನು ದೊಡ್ಡದಾಗಿಸಲು ಅದರ ಮೇಲೆ ಕ್ಲಿಕ್ಕಿಸಿ)

ಆಸ್ಟ್ರೇಲಿಯನ್ನರು ಪ್ರವಾಸ ಪ್ರಿಯರು. ವಾರದ ಐದು ದಿನ ದುಡಿದು ವೀಕೆಂಡಿನಲ್ಲಿ ಕುಟುಂಬ ಸಮೇತರಾಗಿ ತಿರುಗಾಡಲು ಹೊರಟುಬಿಡುತ್ತಾರೆ.ಈ ಚಿತ್ರದಲ್ಲಿ  ಕಾಣುತ್ತಿರುವುದು ಕ್ಯಾರಾವಾನ್ (Caravan).ಇದೊಂದು ಐಶಾರಾಮಿಯಾದ ಮೂವಿಂಗ್ ಹೌಸ್.ಒಂದು ಸುಸಜ್ಜಿತವಾದ ಗೃಹದಲ್ಲಿ ಇರುವ ಎಲ್ಲಾ ಸೌಕರ್ಯಗಳೂ ಇದರಲ್ಲಿರುತ್ತದೆ.ಇದರಲ್ಲಿ ಕಿಚನ್,ಬೆಡ್ ರೂಂ,ಟಾಯ್ಲೆಟ್ ಮತ್ತು ಬಾತ್ ರೂಂ ಸೌಲಭ್ಯವಿರುತ್ತದೆ. ಅಡಿಗೆಗೆ ಬೇಕಾದ ಸಾಮಾಗ್ರಿಗಳು, ವಿಶ್ರಮಿಸಲು ಅಗತ್ಯವಾದ ವಸ್ತುಗಳು ಮತ್ತು ಸನ್ ಬಾತ್ ಗೆ ಬೇಕಾದ ಮಂಚಗಳ ವ್ಯವಸ್ಥೆಯೂ ಇರುತ್ತದೆ. ಇದನ್ನು ತಮ್ಮ ಕಾರಿಗೆ ಸೇರಿಸಿಕೊಂಡು ಹೊರಟರೆ ಮುಗಿಯಿತು ,ದೇಶ-ವಿದೇಶಗಳ ಪ್ರವಾಸವನ್ನು ನಿರಾತಂಕವಾಗಿ ಮಾಡಬಹುದು.

ಕ್ಯಾರಾವಾನುಗಳನ್ನು ಎಲ್ಲೆಂದರಲ್ಲಿ ಪಾರ್ಕ್ ಮಾಡುವಂತಿಲ್ಲ.ಇವುಗಳಿಗಾಗಿಯೇ ವಿಶೇಷವಾದ ಪಾರ್ಕಿಂಗ್ ಸೌಲಭ್ಯವಿರುತ್ತದಂತೆ.ಈ ಸ್ಥಳಗಳಲ್ಲಿ ನಿಲ್ಲಿಸಲು ವರ್ಷಕ್ಕೊಮ್ಮೆ ಡಾಲರುಗಳನ್ನು ಪಾವತಿಸಿ ಸದಸ್ಯತ್ವವನ್ನು ಪಡೆದಿರಬೇಕು ಅಷ್ಟೆ.ಕ್ಯಾರಾವಾನ್ ಪಾರ್ಕಿಂಗಿಗೆ ಮೆಂಬರಾದವರಿಗೆ ಆಸ್ಟ್ರೇಲಿಯಾದಲ್ಲಿ ಎಲ್ಲಿಯಾದರೂ, ಇದಕ್ಕಾಗಿ ನಿಗದಿತವಾದ ಸ್ಥಳದಲ್ಲಿ ಪಾರ್ಕ್ ಮಾಡಲು ಅನುಮತಿ ಇರುತ್ತದೆ.

ವಿಶಿಷ್ಟ ವಿನ್ಯಾಸದ ಮನೆಗಳು









ಇವು ಈ ದೇಶದಲ್ಲಿ ಕಾಣುವ ವಿಶಿಷ್ಟ ವಿನ್ಯಾಸದ ಹಳೆಯ ಕಾಲದ ಮನೆಗಳು.ಹಿಂದೆಲ್ಲ ಅಂದರೆ ಮೊದಲಿಗೆ ಯುರೋಪಿಯನ್ನರು ಈ ಖಂಡಕ್ಕೆ ಬಂದಾಗ  ಇಲ್ಲಿ  ಹಾವುಗಳು ಮತ್ತು ಅನೇಕ ರೀತಿಯ ವಿಷಜಂತುಗಳು ಹೆಚ್ಚಾಗಿದ್ದುದರಿಂದ ಅವುಗಳಿಂದ ರಕ್ಷಣೆಗಾಗಿ ಮನೆಗಳನ್ನು ಎತ್ತರದಲ್ಲಿ ಕಟ್ಟಿಕೊಳ್ಳುತ್ತಿದ್ದರು.ಹಾಗಾಗಿ ಈ ದೇಶದಲ್ಲಿ ೮-೧೦ ಅಡಿ ಪಿಲ್ಲರ್ ಗಳ ಮೇಲೆ ವಾಸಕ್ಕೆ ಕಟ್ಟಿದ ವಿಶಿಷ್ಟ ಶೈಲಿಯ ಮನೆಗಳನ್ನು ನೋಡಬಹುದು.ಕೆಳಗಡೆ ಕಾರು ನಿಲ್ಲಿಸಲು ಮತ್ತು ಹೂವಿನ ತೋಟವನ್ನು ಮಾಡಿಕೊಂಡು,ಮೇಲ್ಛಾವಣೆಯಲ್ಲಿ ವಾಸಕ್ಕೆ ಕಟ್ಟಿದ ಹಳೆಯ ಕಾಲದ ಮನೆಗಳು ನನ್ನನ್ನು ತುಂಬಾ ಆಕರ್ಷಿಸಿದವು.ಎತ್ತರದ ಗುಡ್ಡಗಳ ಮೇಲೆ ಅಲ್ಲಲ್ಲಿ ಕಟ್ಟಿರುವ ಇಂತಹ ಮನೆಗಳನ್ನು ನಾವು ನೋಡಬಹುದು.ಅಲ್ಲಿನ ಸುತ್ತಮುತ್ತಲ ದ್ವೀಪಗಳಲ್ಲಿ ಈಗಲೂ ಈ ರೀತಿಯ ಕಾಟೇಜುಗಳಲ್ಲಿ ಪ್ರವಾಸಿಗರಿಗೆ ಉಳಿದುಕೊಳ್ಳಲು ಅನುಕೂಲವಿದೆ.ಈ ಮನೆಗಳು ನನಗೆ ನಮ್ಮ  ಹಳ್ಳಿಗಳಲ್ಲಿ ಈಗಲೂ ಇರುವ ಹಳೆಯ ಕಾಲದ ಸುಂದರ ವಿನ್ಯಾಸದ ಮನೆಗಳನ್ನು ನೆನಪಿಗೆ ತಂದಿತು.

ದ್ವಿಚಕ್ರ ವಾಹನಗಳು


ಈ ದೇಶದಲ್ಲಿ ದ್ವಿಚಕ್ರ ವಾಹನಗಳು ತುಂಬಾ ಕಡಿಮೆ.ಎಲ್ಲೆಂದರಲ್ಲಿ ಐಶಾರಾಮಿ ಕಾರುಗಳೇ ಕಾಣುತ್ತವೆ.ಮನೆ ಬಿಟ್ಟು ಹೊರಗೆ ಬಂದರೆ ನನಗೆ ಜಯಶ್ರೀಯವರು ಹಾಡಿರುವ  "ಕಾರ್.. ಕಾರ‍್.. ಕಾರ್.. ಕಾರ್.. ಎಲ್ನೋಡಿ ಕಾರ್...." ಹಾಡು ನೆನಪಾಗುತ್ತಿತ್ತು.ಟ್ಯಾಕ್ಸಿ ವ್ಯವಸ್ಥೆ ಇದೆ.ಆದರೆ ಆಟೋಗಳ ಗಲಾಟೆ ಇಲ್ಲ. ಮ್ಯಾಗ್ನೆಟಿಕ್ ಐಲ್ಯಾಂಡಿನಲ್ಲಿ ನಾನು ಗಮನಿಸಿದ ದ್ವಿಚಕ್ರ ವಾಹನದಲ್ಲಿ ಒಬ್ಬರು ಮಾತ್ರ ಕುಳಿತುಕೊಳ್ಳುವ ವ್ಯವಸ್ಥೆ ಇತ್ತು.

ಸೈಕಲ್ಲುಗಳು

ಆದರೆ ಇಲ್ಲಿ ಸೈಕಲ್ಲುಗಳ ಬಳಕೆ ಹೆಚ್ಚು.ಹೈವೇಗಳಲ್ಲಿ ಕೂಡ ಸೈಕಲ್ಲು ಸವಾರರು ಹೋಗಲು ಮತ್ತು ರಸ್ತೆ ದಾಟಲು ಪ್ರತ್ಯೇಕ ಏರ್ಪಾಟುಗಳನ್ನು ಮಾಡಿದ್ದಾರೆ.ಇದು ಇಲ್ಲಿನವರ ಪರಿಸರದ ಬಗ್ಗೆ ತೋರಿಸುವ ಕಾಳಜಿಯನ್ನು ಎತ್ತಿ ತೋರಿಸುತ್ತದೆ.ಜೊತೆಗೆ ಪೆಟ್ರೋಲನ್ನು ಉಳಿಸಿದ ಹಾಗೂ ಆಗುತ್ತದೆ ಅಂಬೋಣ.