ವಿದೇಶ ವಿಹಾರ - 13 - Sky Rail Experience









ಕೈರ್ನ್ಸ್ ನಿಂದ ಹದಿನೈದು ನಿಮಿಷಗಳ ಡ್ರೈವ್ ಮಾಡಿದರೆ "ಕುರಾಂಡ" ತಲುಪಬಹುದು.
ಸಾಮಾನ್ಯವಾಗಿ ಹಳಿಗಳ ಮೇಲೆ ಚಲಿಸುವ ರೈಲಿನಲ್ಲಿ ನಾವೆಲ್ಲರೂ ಕುಳಿತು ಆನಂದಿಸಿರುತ್ತೇವೆ. ಕುರಾಂಡದಲ್ಲಿ ಇರುವುದು ಸ್ಕೈರೈಲು.....!!! ಕೇವಲ ಒಂದು ಕೇಬಲ್ಲಿನ ಆಧಾರ  ದಿಂದ ಚಲಿಸುವ ಸ್ಕೈರೈಲಿನ ಗೊಂಡಾಲದಲ್ಲಿ ಕುಳಿತು, ಸಾವಿರಾರು ಅಡಿಗಳ ಮೇಲೆ ಪಯಣಿಸುವ ವಿಭಿನ್ನ ಅನುಭವವನ್ನು ನಾವಿಲ್ಲಿ ಪಡೆಯಬಹುದು.

ಸ್ಕೈರೈಲಿನಲ್ಲಿ ಬಾರೋನ ಫಾಲ್ಸಿನತ್ತ ನಮ್ಮ ಪಯಣ...
ಆಕಾಶರೈಲಿನಲ್ಲಿ ನಾವು...ಕೆಳಗೆ ಮಾಮೂಲಿ ರೈಲು...!!!!
 ಇಲ್ಲಿನ ಸಂರಕ್ಷಿತ ಮಳೆ ಕಾಡನ್ನು ಗೊಂಡಾಲ(ಕ್ಯಾಬಿನ್)ದಲ್ಲಿ ಕುಳಿತು ಕೇಬಲ್ ವೇನಲ್ಲಿ ಹೋಗುತ್ತಾ ವೀಕ್ಷಿಸುವುದು ಒಂದು ವಿನೂತನ ಅನುಭವ.ಇದಕ್ಕೆ ಸ್ಕೈರೈಲ್ ಎಂದು ಕರೆಯುವರು. ಈ ಅರಣ್ಯದಲ್ಲಿ ಅನೇಕ ಜಾತಿಯ ಸಸ್ಯ ಪ್ರಭೇದಗಳು ಮತ್ತು ಆರ್ಕಿಡ್,ಚಿಟ್ಟೆಗಳ ಮತ್ತು ಪಕ್ಷಿಗಳ ಪ್ರಭೇದಗಳಿವೆ. ಗೊಂಡಾಲದಲ್ಲಿ ಕುಳಿತು ಕೆಳಗೆ ಕಾಣುವ ವನಸಿರಿಯ ಸೊಬಗನ್ನು ಸವಿಯಬಹುದು.

ಬಾರೋನ ಜಲಪಾತದ ರಮ್ಯ ನೋಟ

 ಕುರಾಂಡ ಟರ್ಮಿನಲ್ ನಿಂದ ಕೇಬಲ್ ಕಾರಿನಲ್ಲಿ ಹೊರಟರೆ ನಡುವೆ ಎರಡು ನಿಲ್ದಾಣಗಳಿವೆ. ಬಾರೋನ ಫಾಲ್ಸ್ ಸ್ಟೇಷನ್ ಮತ್ತು ರೆಡ್ ಪೀಕ್ ಸ್ಟೇಷನ್.ಇಲ್ಲಿ ಇಳಿದು ಕಾಡಿನಲ್ಲಿ ನಡೆದುಕೊಂಡು ಹೋಗಿ(ಇದಕ್ಕಾಗಿ ದಾರಿಯನ್ನು ಮಾಡಿದ್ದಾರೆ) ಫಾಲ್ಸ್ ಮತ್ತು ಪ್ರಕೃತಿಯ ಸೊಬಗನ್ನು ಹತ್ತಿರದಿಂದ ನೋಡಿ ಮತ್ತೆ ಗೊಂಡಾಲ ಹತ್ತಬೇಕು.
ಅಟ್ಟಣೆಗೆಯಲ್ಲಿ ನಿಂತು ಸಮೀಪದಿಂದ ಜಲಪಾತ ದರ್ಶನ
Red Peak Station










ಇಲ್ಲಿನ ಎರಡೂ ನಿಲ್ದಾಣಗಳಲ್ಲಿ ಇರುವ ಕಂಪ್ಯೂಟರ್ ಮತ್ತು ಭಿತ್ತಿಚಿತ್ರಗಳ ಮೂಲಕ ಈ ಅರಣ್ಯದಲ್ಲಿ ವಾಸಿಸುವ ಜೀವಿಗಳು,ವೃಕ್ಷ ಸಂಪತ್ತು ಮತ್ತು ಅವುಗಳ ಸಂರಕ್ಷಣೆಗಾಗಿ ತೆಗೆದುಕೊಂಡಿರುವ ಕ್ರಮಗಳ ಸಮಗ್ರ ಪರಿಚಯ ಮಾಡಿಕೊಡಲಾಗುತ್ತದೆ.ನಮ್ಮ ಈ ಆಕಾಶರೈಲಿನ ಪಯಣ ಕಾರ್ನವೋನಿಕಾ ಟರ್ಮಿನಲ್ಲಿನಲ್ಲಿ ಮುಕ್ತಾಯಗೊಂಡಿತು.

 ಮೇಲಕ್ಕೆ ಏರುವಾಗ ನಿಧಾನವಾಗಿ ಚಲಿಸುವ ಗೊಂಡಾಲಗಳು ಇಳಿಯುವಾಗ ಸರಸರನೆ ಇಳಿದಂತೆ ಭಾಸವಾಗುತ್ತದೆ.ಇದು ಒಂದು ಅದ್ಭುತವಾದ ಅನುಭವ ನೀಡುವುದರೊಂದಿಗೆ ಮನಸ್ಸಿಗೆ ಉಲ್ಲಾಸವನ್ನು ತಂದುಕೊಟ್ಟಿತು.

ಹಿಂದಿಯಲ್ಲಿ ಬರೆದಿರುವ ಅನಿಸಿಕೆಯನ್ನು ಗಮನಿಸಿ..! 
ಕುರಾಂಡದಲ್ಲಿನ ಬಟರ್ ಫ್ಲೈ ಸ್ಯಾನ್ಚುರಿ ಯಲ್ಲಿ ಚಿಟ್ಟೆಗಳ ವೈವಿಧ್ಯಮಯ ಲೋಕ ಮನಸೆಳೆಯುತ್ತದೆ. ವಿವಿಧ ಜಾತಿಯ,ರಂಗು ರಂಗಿನ ಚಿಟ್ಟೆಗಳ ಜೀವನ ಶೈಲಿ, ಅವುಗಳ ಸ್ವಚ್ಛಂದ ವಿಹಾರ ಕಣ್ಣಿಗೆ ಹಬ್ಬವನ್ನುಂಟು ಮಾಡುತ್ತದೆ.   ಇದಲ್ಲದೆ ಕೋಯಲ ಪಾರ್ಕ್,ಆರ್ಟ್ ಗ್ಯಾಲರಿಗಳು ಕುರಾಂಡದಲ್ಲಿ ನೋಡಬಹುದಾದ ಇನ್ನಿತರ ಸ್ಥಳಗಳು. 

ವಿದೇಶ ವಿಹಾರ - 12 - "Indian cuisine"


ಕೈರ್ನ್ಸ್ ನಲ್ಲಿ ಒಂದು ಇಂಡಿಯನ್ ರೆಸ್ಟೋರೆಂಟಿದೆ. ಅಲ್ಲಿಗೆ ನೀವು ಊಟಕ್ಕೆ ಹೋಗಿ ಎಂದು ನಮ್ಮ ಅಳಿಯ ಅಲ್ಲಿನ ಅಡ್ರೆಸ್ ಕೊಟ್ಟಿದ್ದರು.ಹಾಗಾಗಿ ನಮಗೆ ಸಸ್ಯಾಹಾರಿ ಊಟ ಸಿಗುವುದು ತೊಂದರೆ ಆಗಲಿಲ್ಲ.ಆದರೆ ಅಲ್ಲಿಗೆ ಹೋದಾಗ ನಮಗೆ ಇನ್ನೂ ಅಚ್ಚರಿಯಾಗಿದ್ದೆಂದರೆ "ಇಂಡಿಯನ್ ಕ್ಯೂಸಿನ್" ಮಾಲೀಕರು ನಮ್ಮ ಮಂಗಳೂರಿನವರು ಎಂಬುದು.ನಾವು ಕನ್ನಡದಲ್ಲಿ ಮಾತನಾಡುವುದನ್ನು ಕಂಡು ಅವರು ನಮ್ಮನ್ನು ಕನ್ನಡದಲ್ಲಿ ಮಾತನಾಡಿಸಿದಾಗ ನಮಗೆ ಆತ್ಮೀಯತೆ ಹೆಚ್ಚಾಯಿತು.ಅವರು ನಮಗಾಗಿ ೨-೩ ದಿನವೂ ಸಸ್ಯಾಹಾರಿ ಊಟ-ತಿಂಡಿಯನ್ನು ತಯಾರು ಮಾಡಿಕೊಟ್ಟರು.ನಾವು ಸುತ್ತಮುತ್ತಲ ಸ್ಥಳಗಳನ್ನು ನೋಡಿಕೊಂಡು ಊಟಕ್ಕೆ ಇಲ್ಲಿಗೇ ಬರುತ್ತಿದ್ದೆವು.

ಅವರು ಆಸ್ಟ್ರೇಲಿಯಾಕ್ಕೆ ಹೋಗಿ ಇಪ್ಪತೈದು ವರ್ಷಗಳಾದುವಂತೆ.ಮಕ್ಕಳಿಬ್ಬರೂ ಓದಿ ಬೇರೆಡೆ ಕೆಲಸದಲ್ಲಿದ್ದಾರೆ. ಇವರು ಮತ್ತು ಇವರ ಪತ್ನಿ ಇಲ್ಲಿ ಹೋಟೆಲ್ ನಡೆಸುತ್ತಿದ್ದಾರೆ.ಕೆಲಸಕ್ಕೆ ಜನ ಸಿಗದ ಬಿಸಿ ಇವರಿಗೂ ತಟ್ಟಿದೆ. ಯಾರೂ ಸಿಗದಿದ್ದಾಗ ಈ ಗಂಡ-ಹೆಂಡತಿಯೇ ಅಡಿಗೆಯವರು,ಸಪ್ಲೈಯರ್,ಕ್ಲೀನರ್ ಎಲ್ಲವೂ ಆಗಬೇಕಾದ ಅನಿವಾರ್ಯತೆಯನ್ನು ಕೊಂಚ ಬೇಸರದಿಂದಲೇ ತಿಳಿಸಿದರು.

ಹೋಟೆಲ್ಲಿನ ಗೋಡೆಯಲ್ಲಿ ಶಿವಾಜಿ ಮತ್ತು ಭಾರತೀಯ ಸಂಸ್ಕೃತಿಯನ್ನು ಬಿಂಬಿಸುವ ಫೋಟೋಗಳನ್ನು ಹಾಕಿದ್ದಾರೆ.ಆ ದೇಶದಲ್ಲಿ ನಮ್ಮವರನ್ನು ಕಂಡು ಸಂತಸವಾಯಿತು. ಕೈರ್ನ್ಸ್ ಪ್ರವಾಸದಲ್ಲಿ ನಮಗೆ ಖುಷಿ ನೀಡಿದ ಅನುಭವಗಳಲ್ಲಿ ಇದೂ ಒಂದು.ವಾಪಾಸಾಗುವಾಗ ಈ ದಂಪತಿಗಳಿಗೆ ಧನ್ಯವಾದ ಸಲ್ಲಿಸಿ ಹೊರಟೆವು.