ಹಚ್ಚೋಣ ಹಣತೆ


ಬೆಲ್ಲದಂತಹ ಬದುಕು | ಬಲ್ಲಿದರ ಒಡನಾಟ |
ಎಲ್ಲ ಭಾಗ್ಯವ ಕೊಟ್ಟ ಗಣಪಗೆ | ನಮಿಸುತ್ತ
ಎಲ್ಲರೂ ಬೆಳಗೋಣ ಹಣತೆಯೊಂದ |

ಪದವಿಡಲು ನೆಲೆಯಿತ್ತು | ವಿಧವಿಧದ ಬೆಳೆ ಕೊಟ್ಟು |
ಬದುಕಿಗಾಸರೆಯಾದ ತಾಯಿ | ಭೂದೇವಿಗೆ
ಮುದದಲಿ  ಬೆಳಗೋಣ ಹಣತೆಯೊಂದ |

ಹೆತ್ತ ತಾಯಿಯ ಸ್ಮರಿಸಿ | ಪಿತನ ಪಾದಕೆ ನಮಿಸಿ|
ಮತ್ತೆ  ತಿದ್ದಿದ ಗುರುವಿಗೆ | ವಂದಿಸುತ
ಕೂತಲ್ಲೇ ಹಚ್ಚೋಣ ಹಣತೆಯೊಂದ |

ಮಕ್ಕಳಿಗೆ ಹಾಲಿತ್ತು | ಒಕ್ಕಲಿಗೆ ಸಗಣಿಯಿಟ್ಟು|
ಮುಕ್ಕೋಟಿ ದೇವತೆಯ ನೆಲೆಯಾದ | ಗೋಮಾತೆಗೆ 
ಅಕ್ಕರೆಯಲಿ ಹಚ್ಚೋಣ ಹಣತೆಯೊಂದ |



#ಸರ್ವರಿಗೂ ದೀಪಾವಳಿಯ ಶುಭಾಶಯಗಳು. #