ವಿದೇಶ ವಿಹಾರ - 21 - "ಮಿಲನ" House Warming Ceremony

ನನ್ನ ಮಗಳ ನೂತನ ಮನೆಯ ಗೃಹಪ್ರವೇಶದ ಹೋಮಹವನಾದಿ ಕಾರ್ಯಕ್ರಮಗಳು ಗುರುವಾರ ಬಂದಿದ್ದರಿಂದ ಆತ್ಮೀಯರೆಲ್ಲರಿಗೂ ಬರಲಾಗಿರಲಿಲ್ಲ.ಹಾಗಾಗಿ ಹೊಸ ಮನೆಗೆ ಹೋದ ನಂತರ ಒಂದು ಶನಿವಾರದ ಸಂಜೆ ನಮ್ಮ ಮಗಳು-ಅಳಿಯನ ಸ್ನೇಹಿತರು,ಸಹೋದ್ಯೋಗಿಗಳು ಮತ್ತು ಅಲ್ಲಿನ ಭಾರತೀಯ ಸ್ನೇಹಿತರನ್ನು ಆಹ್ವಾನಿಸಿ House Warming Ceremonyಯನ್ನು ಏರ್ಪಡಿಸಿದ್ದರು.ವಿದೇಶಗಳಲ್ಲಿ ಗೃಹಪ್ರವೇಶ ಕಾರ್ಯಕ್ರಮಕ್ಕೆ  House Warming Ceremony ಎನ್ನುತ್ತಾರಂತೆ. ತಿಂಗಳು ಮುಂಚೆಯೇ ಎಲ್ಲರಿಗೂ ಮೈಲ್ ಮೂಲಕ ಆಮಂತ್ರಣ ಪತ್ರಿಕೆಯನ್ನು ಕಳುಹಿಸಲಾಗಿತ್ತು.

ನಮಗೆ ಹೊಸ ಮನೆಗೆ ಹೋದನಂತರ ಹದಿನೈದು ದಿನಗಳ ಕಾಲಾವಕಾಶ ಸಿಕ್ಕಿದ್ದರಿಂದ ,ಮನೆಯ ಎಲ್ಲಾ ಸಾಮಾನುಗಳನ್ನೂ ವ್ಯವಸ್ಥಿತವಾಗಿ ಜೋಡಿಸಿಕೊಳ್ಳಲು ಅವಕಾಶವಾಯಿತು. 

ನನ್ನ ಮಗಳ ನೇತೃತ್ವದಲ್ಲಿ ಪ್ರತಿಯೊಂದು ವಸ್ತುಗಳೂ ಎಲ್ಲೆಲ್ಲಿಗೆ ಜೋಡಿಸಬೇಕೋ ಅಲ್ಲಲ್ಲಿ ಸಿಂಗಾರಗೊಂಡವು.  Office room, Hall, Dining hall,Kitchen,Bed rooms,Bath rooms, Home Theatre  ಮತ್ತು  Pooja room ಎಲ್ಲವೂ ಅಚ್ಚುಕಟ್ಟಾಗಿ ಸಿದ್ಧಗೊಂಡವು.ಇವಲ್ಲದೆ ಹೊರಗೆ Garden ಮತ್ತು Swimming pool ಸುತ್ತಮುತ್ತಲೂ ಸ್ವಚ್ಛವಾದವು. 

ಮನೆ ಮುಂದೆ ವಿದ್ಯುತ್ ದೀಪಗಳನ್ನು ಬಿಡಲಾಯಿತು.ಒಳಗೆ ಹಾಲ್ ನಲ್ಲಿ ಬಲೂನ್ ಮತ್ತು ಹೂವಿನ ಬೊಕ್ಕೆಗಳನ್ನಿಟ್ಟು ಅಲಂಕರಿಸಲಾಯಿತು. ಭಾರತಾಂಬೆಯ ಮುಂದೆ ದೀಪ  ಬೆಳಗಿಸಿ ಗೌರವಿಸಲಾಯಿತು.

ಬಂದವರು ಹಾಯಾಗಿ ಕುಳಿತುಕೊಳ್ಳಲು Swimming pool ಬಳಿ ಗಾರ್ಡನ್ನಿನಲ್ಲಿ ಕುರ್ಚಿಗಳನ್ನು ಹಾಕಿ ವ್ಯವಸ್ಥೆಗೊಳಿಸಲಾಯಿತು.ಪ್ಯಾಟಿಯೊನಲ್ಲಿ ಬಫೆ(ಊಟ)ಗೆ ಸಿದ್ಧಗೊಳಿಸಲಾಯಿತು.

ಪರ್ತ್ , ಮೆಲ್ಬೋರ್ನ್ ಮತ್ತು ನ್ಯೂಜಿಲ್ಯಾಂಡ್ ನಿಂದ ಸ್ನೇಹಿತರು ಒಂದು ದಿನ ಮೊದಲೇ ಆಗಮಿಸಿದ್ದರು. 

ಭಾರತೀಯರೇ ಅಲ್ಲದೆ ಆಸ್ಟ್ರೇಲಿಯನ್ಸ್,ಅಮೆರಿಕನ್ಸ್,ಚೈನೀಸ್ ಮತ್ತಿತರರು ಸೇರಿದ್ದರಿಂದ ಈ ಕಾರ್ಯಕ್ರಮವು ಒಂದು ರೀತಿ ವಿಶ್ವ ಬ್ರಾತೃತ್ವವನ್ನು ಪ್ರತಿನಿಧಿಸುವಂತಿತ್ತು. ಭಾರತೀಯರಾದ ನಮಗೆ ವಿದೇಶಿಯರ ಚಟುವಟಿಕೆಗಳನ್ನು ಹತ್ತಿರದಿಂದ ನೋಡುವ ಕುತೂಹಲ.

ಸಂಜೆ 5.30 ಗಂಟೆಗೆ ಪಾರ್ಟಿ ಎಂದು ಒಂದು ತಿಂಗಳು ಮೊದಲೇ mailನಲ್ಲಿ invitation ಪೋಸ್ಟ್ ಮಾಡಲಾಗಿತ್ತು.ಅಲ್ಲಿ ಟೈಂ ಅಂದ್ರೆ ಟೈಂ.ಸಂಜೆ ಐದರಿಂದಲೇ ಅತಿಥಿಗಳು ಆಗಮಿಸಲಾರಂಭಿಸಿದರು. ಅಲ್ಲೆಲ್ಲಾ ಈ ರೀತಿಯ ಸಮಾರಂಭಗಳು ಸ್ವಲ್ಪ ಅಪರೂಪವಾದ್ದರಿಂದ ಭಾರತೀಯರಿರಲಿ ಅಥವ ಇತರರೇ ಆಗಲಿ ತುಂಬಾ ಸಂತೋಷದಿಂದ ಭಾಗವಹಿಸುತ್ತಾರೆ.ನಮ್ಮಂತೆ ಊಟದ ಸಮಯಕ್ಕೆ ಹೋಗಿ,ಮನೆ ನೋಡಿದ ಶಾಸ್ತ್ರ ಮಾಡಿ, ಶುಭಾಶಯ ತಿಳಿಸಿ ಬರುವುದಿಲ್ಲ. ಒಂದು ಸಂಜೆ ಸ್ನೇಹಿತರು ಒಟ್ಟಿಗೆ ಸೇರಲು ಅವಕಾಶವಾಯಿತೆಂದು ಸಂತಸಪಡುತ್ತಾರೆ.ನೂತನ ಮನೆಯ ಒಂದೊಂದು ಕೋಣೆಯನ್ನೂ ವೀಕ್ಷಿಸಿ,ವಿಶೇಷತೆಗಳನ್ನು ಗುರುತಿಸಿ,ಮೆಚ್ಚುಗೆ ವ್ಯಕ್ತಪಡಿಸಿ ಆತ್ಮೀಯ ಭಾವನೆ ತೋರಿದರು. ಕಾರ್ಯಕ್ರಮಕ್ಕೆ ಬಂದಿದ್ದ ಅತಿಥಿಗಳು ಮೊದಲು ನನ್ನ ಮಗಳು-ಅಳಿಯ ಇಬ್ಬರಿಗೂ ಹೂವಿನ ಬೊಕ್ಕೆಯನ್ನಿತ್ತು ತುಂಬು ಹೃದಯದಿಂದ ಶುಭಾಶಯ ಕೋರುತ್ತಿದ್ದುದು ನೋಡಲು ಖುಷಿಯಾಗುತ್ತಿತ್ತು.ವಿದೇಶಿಯರಲ್ಲೂ ಸಹ ವಿಶೇಷ ಸಂದರ್ಭಗಳಲ್ಲಿ ಉಡುಗೊರೆಯನ್ನು ಕೊಡುವ ಪದ್ಧತಿಯನ್ನು ನಾನಿಲ್ಲಿ ಕಂಡೆ.  ಆಗಾಗ Juice ಹೀರುತ್ತಾ,ಅತಿಥಿಗಳಿಗಾಗಿಯೇ ಜೋಡಿಸಿಟ್ಟಿದ್ದ ಚಾಕೋಲೆಟ್,ಚಿಪ್ಸ್,ಬಿಸ್ಕತ್ಸ್,ಸಮೋಸ ಮುಂತಾದುವನ್ನು ಮೆಲ್ಲುತ್ತಾ ಇಡೀ ಮನೆಯ ತುಂಬಾ ಓಡಾಡಿ, ಮನೆಯವರೊಂದಿಗೆ ಮತ್ತು ಆಗಮಿಸಿದ್ದ ಇತರರೊಂದಿಗೆ ಮಾತುಕತೆಯಾಡುತ್ತಾ ಕಾಲ ಕಳೆದರು.ಪೂಜಾ ಕೋಣೆ ವಿದೇಶಿಯರನ್ನು ತುಂಬಾ ಆಕರ್ಷಿಸಿತು. 

ರಾತ್ರಿ ಎಂಟರ ನಂತರ ಡಿನ್ನರ್ ಪ್ರಾರಂಭವಾಗಿ ರಾತ್ರಿ ಹನ್ನೊಂದುವರೆ ತನಕವೂ ನೆಡೆಯಿತು. ಗಾರ್ಡನ್ನಿನಲ್ಲಿ  ವ್ಯವಸ್ಥೆ ಮಾಡಿದ್ದ ಕುರ್ಚಿಗಳಲ್ಲಿ ಗುಂಪು ಗುಂಪಾಗಿ ಕುಳಿತು ,ಕೇಸರಿಬಾತ್,ಜಾಮೂನ್,ಸಲಾಡ್,ರಾಯಿತ,ವೆಜಿಟೆಬಲ್ ಪಲಾವ್,ಪೂರಿ,ಸಾಗು,ಮೊಸರನ್ನ ಮುಂತಾದ item ಗಳನ್ನು ಸವಿಯುತ್ತಾ Ice cream ರುಚಿ ನೋಡುತ್ತಾ enjoy ಮಾಡಿದರು.

ಮಕ್ಕಳಿಗಂತೂ ಖುಷಿಯೋ ಖುಷಿ...!!ಮಕ್ಕಳೆಲ್ಲಾ ಸೇರಿ ಬಲೂನಿನಲ್ಲಿ ಆಟವಾಡುತ್ತಾ ತಮಗೆ ಇಷ್ಟವಾದ ಚಾಕೊಲೇಟ್,ಸಮೋಸ Ice cream ತಿನ್ನುತ್ತಾ ತಮ್ಮ ಸಾಂಪ್ರದಾಯಕ ಉಡುಪುಗಳನ್ನು ಧರಿಸಿ ಸಂಭ್ರಮಿಸುತ್ತಿದ್ದುದು ಎದ್ದು ಕಾಣುತ್ತಿತ್ತು.ಮನೆಯ ಒಪ್ಪ ಓರಣವನ್ನು ಗಮನಿದ ಪ್ರತಿಯೊಬ್ಬರೂ " Display homeನಂತಿದೆ ಎಂದು ಮೆಚ್ಚುಗೆ ವ್ಯಕ್ತಪಡಿಸಿದರು.ಎಲ್ಲರಲ್ಲೂ ಭಾನುವಾರದ ಸಂಜೆಯನ್ನು ಸಾರ್ಥಕವಾಗಿ ಕಳೆದ ಸಂತಸ ಕಾಣುತ್ತಿತ್ತು.ಎಲ್ಲರೂ ಹೊರಡುವಾಗ ನನ್ನ ಮಗಳು ನೀಡಿದ ಉಡುಗೊರೆಯನ್ನು ನೋಡಿ ವಿಸ್ಮಿತರಾಗಿ,ಧನ್ಯವಾದಗಳನ್ನು ತಿಳಿಸಿ ಒಬ್ಬೊಬ್ಬರಾಗಿ ತಮ್ಮ ಮನೆಗಳಿಗೆ ಹಿಂದಿರುಗಿದರು.ಕರ್ನಾಟಕ ಮತ್ತು ಭಾರತದ ಕೆಲವು ಸ್ನೇಹಿತರು ರಾತ್ರಿ ಒಂದು ಗಂಟೆಯ ತನಕ ಹಿಂದಿ ಸಿನಿಮಾವನ್ನು ನೋಡಿ ಆನಂದಿಸಿದರು. ಒಟ್ಟಿನಲ್ಲಿ ವಿಭಿನ್ನವಾದ ಒಂದು ಸಂಜೆಯನ್ನು ಕಳೆದ ಅನುಭವ ನಮಗಾಯಿತು.

ಆಸ್ಟ್ರೇಲಿಯಾದ ಜನರು ಹೊಸಮನೆಗೆ ಹೋಗುವಾಗ ನಮ್ಮ ರೀತಿಯಲ್ಲಿ ಗೃಹಪ್ರವೇಶ ಎಂದು ವಿಶೇಷವಾಗಿ ಯಾವುದೇ function ಮಾಡುವುದಿಲ್ಲವಂತೆ.ಆದರೆ ತಮಗೆ ಅತ್ಮೀಯರಾದವರನ್ನು ಒಂದು ದಿನ ಮನೆಗೆ ಆಹ್ವಾನಿಸಿ ಚಿಕ್ಕ ಪಾರ್ಟಿ ಮಾಡುತ್ತಾರೆ ಅಷ್ಟೆ. ನಮ್ಮಂತೆ ನೂರಾರು ಜನರನ್ನು ಒಟ್ಟಿಗೆ ಕರೆಯುವ  ಯಾವುದೇ ಕಾರ್ಯಕ್ರಮವನ್ನೂ ಹಮ್ಮಿಕೊಳ್ಳುವ ಸಂಪ್ರದಾಯ ಅಲ್ಲಿನವರಲ್ಲಿ ಕಂಡುಬರುವುದಿಲ್ಲ.ಮಕ್ಕಳ birthday ಇರಲಿ ,ಮದುವೆ ಇರಲಿ ತಮಗೆ ಬಹಳ ಅತ್ಮೀಯರಾದವರನ್ನು ಮಾತ್ರ ಆಹ್ವಾನಿಸುತ್ತಾರೆ. ಇದೆಲ್ಲ ಅವರು ಬೆಳೆಸಿಕೊಂಡು ಬಂದ ಪದ್ಧತಿ. ಹಾಗಾಗಿಯೇ ವಿದೇಶಿಯರಿಗೆ ನಮ್ಮ ಭಾರತೀಯ ಸಂಸ್ಕೃತಿಯ ಬಗ್ಗೆ ಅಪಾರವಾದ ಆಸಕ್ತಿ. ಭಾರತೀಯರು ಮಾಡುವ ಯಾವುದೇ ಕಾರ್ಯಕ್ರಮಕ್ಕೆ ಕರೆ ಬಂದರೂ ವಿದೇಶಿಯರು ಅದರಲ್ಲಿ ಭಾಗಿಗಳಾಗಲು ತುದಿಗಾಲಲ್ಲಿ ನಿಂತಿರುತ್ತಾರೆ ಎಂದೇ ಹೇಳಬೇಕು. ನಮಗೂ ಅವರಿಗೂ ಆಹಾರ ಪದ್ದತಿಯಲ್ಲಿ ಮತ್ತು ಪ್ರತಿಯೊಂದು ಸಂಸ್ಕೃತಿಯಲ್ಲಿಯೂ ಅಜಗಜಾಂತರ ವ್ಯತ್ಯಾಸವಿದೆ. ಆದರೆ ನಮ್ಮಲ್ಲಿಗೆ ಬಂದಾಗ ನಮ್ಮ ಸಂಪ್ರದಾಯಗಳಿಗೆ ಗೌರವಿಸುವ ದೊಡ್ಡ ಗುಣ ಅವರಲ್ಲಿದೆ. ಒಂದು ಉದಾಹರಣೆ ಹೇಳಬೇಕೆಂದರೆ ವಿದೇಶಿಯರಿಗೆ ತಮ್ಮ ಚಪ್ಪಲಿಗಳನ್ನು ಮನೆಯೊಳಗೆಲ್ಲಾ ಹಾಕಿಕೊಳ್ಳುವ ಅಭ್ಯಾಸವಿದೆ. ಆದರೆ ನಮ್ಮ ಮನೆಯ ಗೃಹಪ್ರವೇಶದ ದಿನ,ನಮ್ಮಂತೆ ಅವರೂ ಸಹ   ತಮ್ಮ ತಮ್ಮ ಚಪ್ಪಲಿ,ಶೂಗಳನ್ನು ಹೊರಗಡೆಯೇ ಬಿಟ್ಟು ಬಂದರು. ...!!ನಮ್ಮೊಡನೆ ಕಲೆತು , ನಾವು ಮಾಡಿದ ಅಡಿಗೆಯನ್ನು ಹೊಟ್ಟೆ ತುಂಬಾ ತಿಂದು, ಮನಃ ಪೂರ್ವಕವಾಗಿ ಚೆನ್ನಾಗಿದೆ ಎಂದು ಹೇಳಿ, ಸಮೋಸ, sweet ಗಳನ್ನು ಮತ್ತೆ ಮತ್ತೆ ಹಾಕಿಕೊಂಡು ತಿಂದರು..ಇದನ್ನು ಬರೆಯುವಾಗ ನನ್ನ ಅಳಿಯನ ಸಹೋದ್ಯೋಗಿ ಒಬ್ಬರು ನಮ್ಮ ತಿಳಿಸಾರನ್ನು ಬಹಳ ಇಷ್ಟಪಟ್ಟು ,ಅದನ್ನು ಅನ್ನದೊಡನೆ ಕಲೆಸಿ ತಿನ್ನುವುದನ್ನು ತಿಳಿಯದೆ, ಒಂದು ಸ್ಪೂನ್ ಅನ್ನ ಬಾಯಿಯಲ್ಲಿ ಹಾಕಿಕೊಂಡು ಬೌಲಿನಿಂದ ಸಾರನ್ನು ಹೀರುವ ವಿಷಯವನ್ನು ನನ್ನ ಮಗಳು ಹೇಳಿದ್ದು ನೆನಪಾಗಿ ನಗು ಬರುತ್ತಿದೆ.....!!!

ಭಾರತೀಯರು ತೆಂಗಿನಕಾಯಿಯನ್ನು ಅಡಿಗೆಗೆ ಉಪಯೋಗಿಸುತ್ತಾರೆ ಎಂದು ತಿಳಿದ ಆಸ್ಟ್ರೇಲಿಯಾದ ಒಬ್ಬ ಗೆಳೆಯರು ನಮ್ಮ ಮನೆಗೆ ಒಂದು ದೊಡ್ಡ ಬ್ಯಾಗಿನ ತುಂಬಾ ತೆಂಗಿನಕಾಯಿ ಮತ್ತು  ನೂತನ ಮನೆಯ ಹೋಮದ ದಿನ ಬಾಳೆಕಂದು. ಮಾವಿನಸೊಪ್ಪು ,ಹೂವುಗಳನ್ನು ತಮ್ಮ  ತೋಟದಿಂದ ತಂದುಕೊಟ್ಟದ್ದನ್ನು ನಾನಿಲ್ಲಿ ಉಲ್ಲೇಖಿಸಲು ಇಷ್ಟಪಡುತ್ತೇನೆ.

ಯುರೋಪ್ ದೇಶಗಳಲ್ಲಿ ನಾವು ಅನೇಕ ಚರ್ಚ್ ಗಳನ್ನುಕಾಣಬಹುದು. ಭಾರತದಲ್ಲಿ ಬಿಡಿ… ರಸ್ತೆಗೊಂದು ದೇವಾಲಯ, ಏರಿಯಾಗೊಂದು ಚರ್ಚ್ ಮತ್ತು ಮಸೀದಿಗಳು . ಆದರೆ ಆಸ್ಟ್ರೇಲಿಯಾದಲ್ಲಿ ಚರ್ಚ್ ಗಳು ತುಂಬಾ ಕಡಿಮೆ. ಅಲ್ಲಿ ನಾನು ಚರ್ಚ್ ಗಳನ್ನು ನೋಡಲಿಲ್ಲವೆಂದೇ ಹೇಳಬೇಕು....! ಅವರು ಮಾಡುವ ಕೆಲಸದಲ್ಲೇ ದೇವರನ್ನು ಕಾಣುತ್ತಾರೆ. ಶುಚಿತ್ವಕ್ಕೆ ಹೆಚ್ಚಿನ ಒತ್ತು ನೀಡಿದ್ದಾರೆ.ಇನ್ನೊಬ್ಬರನ್ನು ಗೌರವಿಸುವ ಗುಣ ಅವರಲ್ಲಿದೆ.ಜೀವನದಲ್ಲಿ ಬಂದದ್ದನ್ನು ಬಂದಹಾಗೇ ಸ್ವೀಕರಿಸಿ ದಿನಗಳನ್ನು ಖುಷಿಯಾಗಿ ಕಳೆಯುವ ಲವಲವಿಕೆಯನ್ನು ನಾನು ಅವರಲ್ಲಿ ಗಮನಿಸಿದೆ.

ವಿದೇಶ ವಿಹಾರ - 20 - ಸುಂದರ ನಗರ Townsville

ಆಸ್ಟ್ರೇಲಿಯಾದ Queens Land ರಾಜ್ಯದ ಕಡಲತೀರದ ಒಂದು ಸುಂದರ ನಗರ Townsville.ಈ ನಗರದ ಉತ್ತರಕ್ಕೆ Crains ಮತ್ತು ದಕ್ಷಿಣಕ್ಕೆ Brisbane ನಗರಗಳಿವೆ. ಈ ಎರಡು ದೊಡ್ಡ ನಗರಗಳಿಗೆ ಸೇತುವೆಯಂತಿದೆ ಈ ನಗರ. ತನ್ನ ಹೃದಯ ಭಾಗದಲ್ಲಿರುವ ಕ್ಯಾಸಲ್ ಬೆಟ್ಟ( Castal Hill) ದ ಸುತ್ತ ಹರಡಿಕೊಂಡಿರುವ ಸಮತಟ್ಟಾದ ಪ್ರದೇಶದಲ್ಲಿ ಟೌನ್ಸ್ವಿಲ್ಲ್ ನಗರ ಬೆಳೆದು ನಿಂತಿದೆ. ನಗರದ ತುಂಬೆಲ್ಲಾ ತಲೆ ಎತ್ತಿ ನಿಂತಿರುವ ಮರಗಳು ಈ ಊರನ್ನು ಹಸಿರಾಗಿಸಿವೆ ಮತ್ತು ತಂಪಾಗಿಸಿವೆ. ಇದೊಂದು ಅತ್ಯುತ್ತಮ ವಾಣಿಜ್ಯ ಕೇಂದ್ರ, ಕೈಗಾರಿಕ ಪ್ರದೇಶ, ಬಂದರು ಮತ್ತು ಪ್ರವಾಸೀತಾಣ.ಇಲ್ಲಿನ ಬಂದರಿನಿಂದ ಹಡಗಿನಲ್ಲಿ ಲೋಹಯುಕ್ತ ಅದಿರು, ಸಕ್ಕರೆ ಮುಂತಾದುವುಗಳನ್ನು ಬೇರೆಡೆಗೆ ರಫ್ತು ಮಾಡಲಾಗುತ್ತದೆ. 

ಇದು ಚಿಕ್ಕ ನಗರವಾದರೂ ಸ್ನೇಹಜೀವಿ ಜನರಿರುವ ಸ್ಥಳ. ಇಲ್ಲಿ ವಾಸಿಸುವ ಬಹುತೇಕ ಜನರು ನಗರಕ್ಕೆ ಹತ್ತಿರವಿರುವ ಮೈನಿಂಗ್ ಇಂಡಸ್ಟ್ರಿಗಳಲ್ಲಿ ದುಡಿಮೆ ಮಾಡುತ್ತಾರೆ.ಇಲ್ಲಿನ ಸಾಲ್ಟ್ ವಾಟರ್ ಆಕ್ವೇರಿಯಮ್ ತುಂಬಾ ಪ್ರಸಿದ್ಧವಾದುದು. ಹಸಿರಾದ ಪಾರ್ಕುಗಳು ಮತ್ತು ತಿಳಿನೀರಿನ ಸರೋವರಗಳು ನಗರದ ಸೊಬಗನ್ನು ಹೆಚ್ಚಿಸಿವೆ. ಇಡೀ ನಗರದ ರಸ್ತೆಯ ಇಕ್ಕೆಲಗಳಲ್ಲಿ ಬೆಳೆಸಿರುವ ಹಸಿರು ಲಾನ್ ಕಣ್ಣಿಗೆ ತಂಪನ್ನೀಯುತ್ತದೆ. ನಗರದಲ್ಲಿ ಎಲ್ಲಿಯೇ ಹೋದರೂ ವಾಹನಗಳ ಪಾರ್ಕಿಂಗ್ ವ್ಯವಸ್ಥೆ ತುಂಬಾ ಅಚ್ಚುಕಟ್ಟಾಗಿದೆ.ಇದೊಂದು ನಿರ್ಮಲವಾದ ಸುಂದರ ನಗರ.ಇವು ನಮ್ಮ ದೇಶಕ್ಕೆ ಮಾದರಿಯಾಗಿವೆ.ನಮ್ಮ ಮಗಳು- ಅಳಿಯ, ತಮ್ಮ ಕೆಲಸದೊತ್ತಡದ ಮಧ್ಯೆಯೂ ನಮ್ಮನ್ನು ಎಲ್ಲೆಡೆಯೂ ಸುತ್ತಾಡಿಸಿ,ಅಲ್ಲಿನ ವಿಶೇಷತೆಗಳನ್ನು ನಮಗೆ ವಿವರವಾಗಿ ತಿಳಿಸಿಕೊಟ್ಟರು.ಅದಕ್ಕಾಗಿ ಅವರಿಗೊಂದು ಧನ್ಯವಾದಗಳನ್ನು ನಾನು ಇಲ್ಲಿ ಹೇಳಲೇಬೇಕು. Thanks to Smitha & Girish...

ಈ ನಗರದಲ್ಲಿ ಹರಿಯುವ ರಾಸ್ ನದಿ ನಗರಕ್ಕೊಂದು ಶೋಭೆಯನ್ನು ತಂದಿದೆ.ನಮ್ಮ ಮಗಳಿದ್ದ ’Mint Apartment’ ಈ ನದಿಯ ದಂಡೆಯಲ್ಲಿದೆ.ಮನೆಯ ಹಿಂಭಾಗದ ಟೆರೇಸಿನಲ್ಲಿ ನಿಂತರೆ ನದಿಯ ನೀರಿನ ಏರಿಳಿತಗಳು,ನೀರಿನ ಸಣ್ಣ ಕಲರವ,ಮೀನಿಗಾಗಿ ಗಾಳ ಹಾಕಿ ಕುಳಿತ ಜನ,ಕಾದು ಕುಳಿತು ಸರ್ರನೆ ಹಾರಿ ಬಂದು ಮೀನನ್ನು ಕಚ್ಚಿ ಹಾರುವ ಹಕ್ಕಿಗಳ ದೃಶ್ಯಗಳು ಮನಸೆಳೆಯುತ್ತಿದ್ದವು.
ಇವುಗಳನ್ನು ನೋಡುತ್ತಲೇ ನಮ್ಮ ಊಟೋಪಚಾರಗಳು,     ಮನೆಯ ಎಲ್ಲಾ ಕೆಲಸಗಳು ನಡೆಯುತ್ತಿದ್ದವು ಎಂದರೆ ತಪ್ಪಲ್ಲ....!! ಆ ಸುಂದರ ದಿನಗಳನ್ನು ಯಾವತ್ತಿಗೂ ಮರೆಯಲು ಸಾಧ್ಯವಿಲ್ಲ .

ಟೌನ್ಸ್ವಿಲ್ಲ್ ನಲ್ಲಿ ಜನರ  ಮನರಂಜನೆಗಾಗಿ ಅನೇಕ ಸುಂದರ ಬೀಚ್ ಗಳಿವೆ. ಅವುಗಳಲ್ಲಿ  Pallarenda ಮತ್ತು Strand ಬೀಚುಗಳು ಪ್ರಮುಖವಾದುವುಗಳು.

Pallarenda  Beach

ಇದು ಮರಳಿನಿಂದ ಕೂಡಿರುವ ಪ್ರಕೃತಿದತ್ತವಾದ ಸಮುದ್ರದಂಡೆ.  ಇದನ್ನು ನೋಡಿದರೆ ನಮ್ಮ ಭಾರತದ ಬೀಚುಗಳನ್ನು ನೋಡಿದಂತೆ ಭಾಸವಾಯಿತು. ಆದರೆ ಇಲ್ಲಿರುವ ಸ್ವಚ್ಛತೆಯನ್ನು ಮಾತ್ರ ನಮ್ಮ ಸಮುದ್ರ ತೀರಗಳಲ್ಲಿ ಕಾಣಲು ಎಂದೆಂದಿಗೂ ಸಾಧ್ಯವಿಲ್ಲ ಎಂಬುದು ಮಾತ್ರ ಸತ್ಯ...!!!

Strand Beach

ಸ್ಟ್ರ‍ಾಂಡ್ ಬೀಚ್ ಅತ್ಯಂತ ಉದ್ದವಾದ ಸಮುದ್ರ ತೀರವನ್ನು ಹೊಂದಿದೆ.ರಸ್ತೆ ಮತ್ತು ಸಮುದ್ರ ದಂಡೆಯ ಮಧ್ಯೆ ಬೆಳೆಸಿರುವ ಹಸಿರು ಲಾನ್ ಮತ್ತು ಮರಗಿಡಗಳು ಈ ಬೀಚಿನ ಸೌಂದರ್ಯವನ್ನು ಹೆಚ್ಚಿಸಿದೆ ಎಂದು ಹೇಳಬಹುದು.

ಇದು ಆಸ್ಟ್ರೇಲಿಯಾದಲ್ಲಿಯೇ ಸುಂದರವಾದ,ನಿರ್ಮಲವಾದ ಮತ್ತು ಅತ್ಯುತ್ತಮವಾದ ಬೀಚ್ ಎಂಬ ಹೆಗ್ಗಳಿಕೆಯನ್ನು ಪಡೆದಿದೆಯಂತೆ....! ಇಲ್ಲಿರುವ ಸ್ಟ್ರಾಂಡ್ ಪಾರ್ಕ್, ಸ್ವಿಮ್ಮಿಂಗ್ ಪೂಲ್, ರೆಸ್ಟೋರೆಂಟ್ ಗಳು, ಕಾಫಿಕೆಫೆಗಳ ಅನುಕೂಲಗಳು ಜನರನ್ನು ಆಕರ್ಷಿಸುವಲ್ಲಿ ಮತ್ತು ಮಕ್ಕಳಿಗೆ ಇಷ್ಟವಾಗುವಲ್ಲಿ ನೆರವಾಗಿವೆ.

ಬೆಳಗಿನ ವೇಳೆಯಲ್ಲಿ ಸುಂದರ ಸೂರ್ಯೋದಯವನ್ನು ಮತ್ತು ಸಂಜೆಯ ವರ್ಣರಂಜಿತ ಸೂರ್ಯಾಸ್ತವನ್ನು ಕಾಣಲು ಜನ ಇಲ್ಲಿಗೆ ಬರುತ್ತಾರೆ. ಬೆಳಗಿನ ಮತ್ತು ಸಂಜೆಯ ಜಾಗಿಂಗಿಗೆ ಹೇಳಿಮಾಡಿಸಿದ ಜಾಗವಿದಾಗಿದೆ.  

Castle Hill

ನಗರದ ಪ್ರಮುಖ ಆಕರ್ಷಣೆ ಎಂದರೆ "ಕ್ಯಾಸಲ್ ಹಿಲ್"...!!!!!

ಇದು  ಟೌನ್ಸ್ವಿಲ್ಲ್ ನಗರದ ಮಧ್ಯಭಾಗದಲ್ಲಿದೆ. ಈ ಬೆಟ್ಟವನ್ನು ಕಾಲ್ನಡಿಗೆಯಲ್ಲಿ ಹತ್ತಬಹುದು. ಸಂಜೆಯ ವೇಳೆ ಈ ಬೆಟ್ಟವನ್ನು ಬಹಳ ಜನ ಹತ್ತಿ- ಇಳಿದು ತಮ್ಮ ದೇಹದ ತೂಕವನ್ನು ಸಮತೋಲನದಲ್ಲಿರಿಸಲು ಪ್ರಯತ್ನಿಸುತ್ತಾರೆ. ಅಂದರೆ ವ್ಯಾಯಮಕ್ಕೆ ಉತ್ತಮ ಜಾಗವಿದೆಂದು ಹೇಳಬಹುದು. ಈ ಬೆಟ್ಟದ ಮೇಲೇರಲು ರಸ್ತೆ ಸಹ ಇದೆ. ಹಾಗಾಗಿ ವಾಹನದಲ್ಲಿ ಕೂಡ ಬೆಟ್ಟದ ತುದಿ ತಲುಪಬಹುದು. ಬೆಟ್ಟದ ಮೇಲಿನಿಂದ ಟೌನ್ಸ್ವಿಲ್ಲ್ ನಗರ ಅತಿ ಸುಂದರವಾಗಿ ಕಾಣುತ್ತದೆ..! ಮ್ಯಾಗ್ನೆಟಿಕ್ ದ್ವೀಪದ ದೃಶ್ಯವನ್ನೂ  ಇಲ್ಲಿಂದ ಸವಿಯಬಹುದು.....!! ರಾತ್ರಿ ವೇಳೆಯಲ್ಲಿ ಈ ದೃಶ್ಯಗಳು ಇನ್ನೂ ರಂಜನೀಯವೆನ್ನಿಸುತ್ತವೆ. ಈ ಬೆಟ್ಟವು ಅನೇಕ ಜಾತಿಯ ಸಸ್ಯ ಮತ್ತು ಪಕ್ಷಿಗಳನ್ನು ತನ್ನ ಒಡಲಿನಲ್ಲಿರಿಸಿಕೊಂಡಿದೆ.ಈ ಎಲ್ಲಾ ಕಾರಣದಿಂದಾಗಿ ಈ ಬೆಟ್ಟವು ಪ್ರವಾಸಿಗರನ್ನು ಅಕರ್ಷಿಸುತ್ತಿದೆ.  

Shopping Complex

ಜನಮನ ಸೆಳೆಯುವ ಶಾಪಿಂಗ್ ಮಾಲ್ ಗಳಿವೆ. "ಕ್ಯಾಸಲ್ ಟೌನಿಗೆ" ಹೋದರೆ ಪ್ರತಿಯೊಂದು ವಸ್ತುವೂ ಒಂದೆಡೆಯೇ ಸಿಗುತ್ತದೆ.ಸವಿಸ್ತಾರವಾದ ಪಾರ್ಕಿಂಗ್ ಅನುಕೂಲವಿರುವ ಇಲ್ಲಿ  BIG W , TARGET, WOOLWORTHS, BEST & LESS ಮುಂತಾದ ಬೃಹತ್ತಾದ ಮಾಲ್ ಗಳು ಇಲ್ಲಿ ಒಂದೆಡೆಯೇ ಇವೆ.....!!! ಹಾಗಾಗಿ ಇಲ್ಲಿ ಪರ್ಸಿನ ತುಂಬಾ ಹಣವಿಟ್ಟುಕೊಂಡು  ಒಮ್ಮೆ ಒಳ ಹೋದರೆ, ಹೊರ ಬರಲು ಗಂಟೆಗಳೇ ಬೇಕಾಗುತ್ತದೆ..!!ಆದರೆ ಹಣ ಮಾತ್ರ ನೀರಿನಂತೆ ಹರಿದುಹೋಗುತ್ತದೆ ಅಷ್ಟೆ...!!!!

ಇಂಡಿಯನ್ ಸ್ಟೋರ್ ನಲ್ಲಿ ಭಾರತೀಯರಿಗೆ ಅವಶ್ಯವಾದ ಎಲ್ಲಾ ವಸ್ತುಗಳು ಅಂದರೆ ಅಡುಗೆಗೆ ಬೇಕಾದ ದಿನಸಿ ಸಾಮಾನುಗಳು, ತರಕಾರಿಗಳು ಎಲ್ಲವೂ ದೊರೆಯುತ್ತದೆ.ನಮ್ಮ ದೇಶದಲ್ಲಿ ಸಿಗುವುದಕ್ಕಿಂತಾ ತಾಜಾ ಮತ್ತು ಶುದ್ಧವಾಗಿರುತ್ತವೆ...!!ಇದು ನಿಜಕ್ಕೂ ಭಾರತೀಯರಾದ ನಮಗೆ ಸಮಾಧಾನಕರವಾದ ಸಂಗತಿ.

ನನ್ನ ಮಗಳು ಮತ್ತು ಅಳಿಯ ವಾಸವಾಗಿರುವ ನಗರದ ಬಗ್ಗೆ ನನಗೆ  ಅಭಿಮಾನವಿದೆ.ಅಲ್ಲಿ ಓಡಾಡಿದ ಪ್ರತಿ ನಿಮಿಷವೂ, ಅಲ್ಲಿ ನೋಡಿದ ಪ್ರತಿಯೊಂದು ದೃಶ್ಯವೂ ನನಗೆ ಅವಿಸ್ಮರಣೀಯ ಆನಂದವನ್ನು ತಂದಿದೆ...!!!! ಅಲ್ಲಿನ ಶುಚಿತ್ವ, ಮೂಲಭೂತ ಸೌಕರ್ಯಗಳ ಸಮಂಜಸ ನಿರ್ವಹಣೆಯನ್ನು ಮೆಚ್ಚುವುದರೊಂದಿಗೆ ನಮ್ಮ ದೇಶದಲ್ಲಿ ಇದನ್ನು ಕಾಣುವುದು ಎಂದಿಗೆ ಎನ್ನುವ ಪ್ರಶ್ನೆ ಬೃಹದಾಕಾರವಾಗಿ ನನ್ನನ್ನು ಕಾಡುತ್ತಿದೆ......?!!!!  

ವಿದೇಶ ವಿಹಾರ - 19 - ಮನಸೆಳೆವ Magnetic Island

ಮ್ಯಾಗ್ನೆಟಿಕ್ ಐಲ್ಯಾಂಡ್ ಟೌನ್ಸ್ವಿಲ್ ನಗರದಿಂದ ೭-೮ ಕಿಲೋಮೀಟರ‍್ ದೂರದಲ್ಲಿದೆ. ಫೆರ್ರಿನಲ್ಲಿ ಹೋದರೆ ಇಪ್ಪತ್ತು ನಿಮಿಷಗಳಲ್ಲಿ ತಲುಪಬಹುದು.ಈ ದ್ವೀಪಕ್ಕೆ ಈ ಹೆಸರನ್ನಿಟ್ಟಿದ್ದು ಕ್ಯಾಪ್ಟನ್ ಕುಕ್. ಈ ದ್ವೀಪದ ಹತ್ತಿರ ಬರುತ್ತಿದ್ದಂತೆಯೇ ತನ್ನ ಹಡಗಿನ ಕಾಂಪಾಸ್ಸಿನಲ್ಲಿ ಉಂಟಾದ ಆಯಸ್ಕಾಂತೀಯ ಬದಲಾವಣೆಯನ್ನು ಗಮನಿಸಿ, ಈ ಪ್ರದೇಶದ ಆಯಸ್ಕಾಂತೀಯ ಗುಣವೇ ತನ್ನ ನೌಕೆಯ ಪಥವನ್ನು ಬದಲಾಯಿಸಿತು ಎಂದು ತಿಳಿದು ಇದನ್ನು "ಮ್ಯಾಗ್ನೆಟಿಕ್ ಐಲ್ಯಾಂಡ್" ಎಂದು ಕರೆದನಂತೆ. ನಂತರದ ಬೆಳವಣಿಗೆಗಳಲ್ಲಿ ಈ ಪ್ರದೇಶಕ್ಕೆ ಯಾವುದೇ ರೀತಿಯಾದ ವಿಶೇಷ ಆಯಸ್ಕಾಂತೀಯ ಶಕ್ತಿಯಿಲ್ಲವೆನ್ನುವುದು ತಿಳಿದು ಬಂದಿತಂತೆ.

ಟೌನ್ಸ್ವಿಲ್ ನಗರದಿಂದ ಈ ದ್ವೀಪಕ್ಕೆ ಫೆರ್ರಿಯಲ್ಲಿ ಸಾಗುವುದು ಒಂದು ವಿಶೇಷ ಅನುಭವವನ್ನು ತಂದುಕೊಡುತ್ತದೆ.ಈ ಫೆರ್ರಿಯಲ್ಲಿ ಕುಳಿತಾಗ ನನಗೆ ಸಿಗಂಧೂರಿಗೆ ಲಾಂಚ್ ನಲ್ಲಿ ಪಯಣಿಸಿದ್ದು ನೆನಪಾಯಿತು.ಆ ಲಾಂಚ್ ಚಿಕ್ಕದು ಮತ್ತು ಅಷ್ಟೊಂದು ಸುರಕ್ಷಿತವಾಗಿರಲಿಲ್ಲ ಎನ್ನಿಸಿತ್ತು.   ಆದರೆ ಇಲ್ಲಿನ ಫೆರ್ರಿಗಳು ಬೃಹತ್ತಾಗಿದ್ದುವಲ್ಲದೆ ಎರಡು,ಮೂರು ಅಂತಸ್ತುಗಳನ್ನು ಹೊಂದಿರುತ್ತವೆ.ಕುಳಿತುಕೊಳ್ಳಲು ಆಸನದ ವ್ಯವಸ್ಥೆ ಇರುತ್ತದೆ.ಎಲ್ಲೆಲ್ಲೂ ಶುಚಿತ್ವ ಎದ್ದು ಕಾಣುತ್ತದೆ. ವಿಮಾನದಲ್ಲಿ ಆಗಸದಲ್ಲಿ ಹಾರಾಡುವಾಗ ಉಂಟಾದ ಹಾಗೆಯೇ, ಫೆರ್ರಿಯಲ್ಲಿ ಕುಳಿತು ಸಮುದ್ರದ ಮೇಲೆ ಸಾಗುವಾಗಲೂ ವಿಶೇಷ ಅನುಭವವನ್ನು ಪಡೆದಂತಾಯಿತು. ಆಸ್ಟೇಲಿಯಾಕ್ಕೆ ಬಂದಾಗಿನಿಂದಲೂ ಜನಸಂದಣಿ ಪ್ರದೇಶ ಎನ್ನುವುದೇ ಮರೆತು ಹೋಗಿತ್ತು.ಆದರೆ ಇಲ್ಲಿನ ಟಿಕೆಟ್ ಬುಕ್ಕಿಂಗ್ ಕೌಂಟರಿಗಳಲ್ಲಿ ಮತ್ತು ಫೆರ್ರಿಗಳಲ್ಲಿ ಆಸ್ಟ್ರೇಲಿಯನ್ಸ್ ಮತ್ತು ಅನೇಕ ವಿದೇಶಿಯರನ್ನು ನೋಡಿ ಖುಷಿಯಾಯಿತು.ಅಲ್ಲದೆ ಈ ಪ್ರದೇಶದ ಆದಿವಾಸಿ (ಆಸ್ಟ್ರೇಲಿಯನ್ ಅಬಾರಿಜಿನಲ್ಸ್)ಗಳ ದರುಶನವನ್ನೂ ಪಡೆದೆವು. ಅಲ್ಲಿ ಈ ಮೂಲನಿವಾಸಿಗಳ ಸ್ಥಿತಿಯನ್ನು ಕಂಡು ಮನಸ್ಸು ಆರ್ದ್ರವಾಯಿತು.

ಮ್ಯಾಗ್ನೆಟಿಕ್ ಐಲ್ಯಾಂಡಿನಲ್ಲಿ ಸುಂದರವಾದ ಅನೇಕ ಕೊಲ್ಲಿ ಪ್ರದೇಶಗಳಿವೆ.ಅವುಗಳಲ್ಲಿ ಅರ್ಕಡಿಯಾ ಬೇ, ನೆಲ್ಲೀ ಬೇ,ಹಾರ್ಸ್ ಶೂ ಬೇ ಮತ್ತು ಪಿಕ್ನಿಕ್ ಬೇ ಮುಖ್ಯವಾದವುಗಳು.ನಾವು ಫೆರ್ರಿಯಲ್ಲಿ ಬಂದು ’ನೆಲ್ಲೀ ಬೇ’ನಲ್ಲಿಳಿಯುತ್ತೇವೆ. ಈ ದ್ವೀಪದಲ್ಲಿರುವ ವಿವಿಧ ಜಾತಿಯ ಸಸ್ಯವರ್ಗ, ವರ್ಣರಂಜಿತ ಬೆಟ್ಟ ಪ್ರದೇಶ, ಅಪರೂಪದ ಪ್ರ‍ಾಣಿ-ಪಕ್ಷಿಗಳು ಮತ್ತು ಎತ್ತೆತ್ತಲೂ ಕಾಣುವ ನೀಲ ಸಾಗರ ಪ್ರವಾಸಿಗರನ್ನು ತನ್ನತ್ತ ಸೆಳೆಯುತ್ತಿವೆ.ದ್ವೀಪದ ಎಲ್ಲಾಭಾಗಗಳನ್ನು ನೋಡಲು ಬಸ್ಸಿನ ವ್ಯವಸ್ಥೆ ಇದೆ. ಅಲ್ಲದೆ ಚಿಕ್ಕ ಜೀಪ್ ಗಳಂತಿರುವ ಮೋಕ್ ಗಳು ಮತ್ತು ಟಾಪ್ ಲೆಸ್ ಕಾರುಗಳು ಬಾಡಿಗೆಗೆ ಸಿಗುತ್ತವೆ. ಇಲ್ಲಿ ಸುತ್ತಾಡಲು ಸ್ಕೂಟರ್ ಸಹ ಬಾಡಿಗೆಗೆ ಸಿಗುತ್ತದೆ. ನಾನು ಆಸ್ಟ್ರೇಲಿಯಾಗೆ ಬಂದಾಗಿನಿಂದ ಎಲ್ಲೆಲ್ಲೂ ಬರೀ ಕಾರುಗಳನ್ನೆ ಕಂಡಿದ್ದೆ ಆದರೆ ಸ್ಕೂಟರನ್ನು ನೋಡಿದ್ದು ಇಲ್ಲಿ ಮಾತ್ರ ಎಂದು ಹೇಳಬಹುದು...!! ನಮ್ಮ ಅಳಿಯನ ಪರಿಚಿತರು ನಮಗೆ ಇಲ್ಲಿ ಸುತ್ತಾಡಲು ಎರಡು ಟಾಪ್ ಲೆಸ್ ಕಾರುಗಳನ್ನು ವ್ಯವಸ್ಥೆ ಮಾಡಿಕೊಟ್ಟರು.ಹಾಗಾಗಿ ನಮಗಿಲ್ಲಿ ತಿರುಗಾಡಲು ಮತ್ತು ಸಂಜೆಯತನಕ ಎಲ್ಲವನ್ನೂ ನೋಡಲು ತುಂಬಾ ಅನುಕೂಲವಾಯಿತು. 

 

ಇಲ್ಲಿನ ನ್ಯಾಷನಲ್ ಪಾರ್ಕ್ ಮತ್ತು ಪಕ್ಷಿಧಾಮಗಳಲ್ಲಿ ದಿನದ ಅನೇಕ ಭಾಗವನ್ನು ನಿದ್ದೆಯಲ್ಲಿಯೇ ಕಳೆಯುವ, ಮುದ್ದಾದ ಮಗುವಿನಂತಿರುವ ಅಪರೂಪದ ಪ್ರಾಣಿ ’ಕೊಯಲಾ’ಗಳಲ್ಲದೆ ಅನೇಕ ಬಗೆಯ ಸರಿಸೃಪಗಳನ್ನು,ಪಕ್ಷಿಗಳನ್ನೂ ನೋಡಿ ಮತ್ತು ನಮ್ಮ ಕೈಗಳಲ್ಲಿಡಿದು ಆನಂದಿಸಬಹುದು. ಅವುಗಳೊಂದಿಗೆ ಫೋಟೋಗಳನ್ನೂ ತೆಗೆದುಕೊಳ್ಳಬಹುದು. 

ಈ ದ್ವೀಪದಲ್ಲಿ ಪ್ರವಾಸಿಗರಿಗಾಗಿ ಅನೇಕ ಬಗೆಯ ಆಕ್ವಾಟಿಕ್ ಸ್ಪೋರ್ಟ್ಸ್ ಗಳನ್ನು ಆಡಲು ವ್ಯವಸ್ಥೆ ಮಾಡಿದ್ದಾರೆ. ಜೆಟ್ ಸ್ಕೈ , ಪೆಡಲ್ ಬೋಟುಗಳು ಬಾಡಿಗೆಗೆ ಸಿಗುತ್ತವೆ.

ನಾವು ಪೆಡಲ್ ಬೋಟಿನಲ್ಲಿ ಸಾಗರಯಾನವನ್ನು ಮಾಡಿ ಖುಷಿಪಟ್ಟೆವು. ಸಮುದ್ರದ ದಂಡೆಯಲ್ಲಿ ಮರಳಿನ ಮೇಲೆ ಬಿಸಿಲಿಗೆ ತಮ್ಮ ಮೈ ಚಿಲ್ಲಿ ಮಲಗಿ ಸನ್ ಬಾತ್ ಮಾಡುತ್ತಿರುವ ಆಸ್ಟ್ರೇಲಿಯನ್ನರನ್ನೂ ಕಾಣಬಹುದು.. .!!! ಒಟ್ಟಿನಲ್ಲಿ ಈ ದ್ವೀಪದಲ್ಲಿ ಕಳೆದ ಪ್ರತಿಕ್ಷಣವೂ ನಮಗೆ ನೂತನ ಅನುಭವಗಳನ್ನು ನೀಡಿ ನಮಗೆ ಹರ್ಷ ಕೊಟ್ಟಿತು. ಹೆಸರಿಗೆ ತಕ್ಕಂತೆ ಈ ದ್ವೀಪಕ್ಕೆ ಪ್ರವಾಸಿಗರನ್ನು ಆಯಸ್ಕಾಂತದಂತೆ ಸೆಳೆಯುವ ಶಕ್ತಿ ಇರುವುದಂತೂ ಸತ್ಯ...!!    

ವಿದೇಶ ವಿಹಾರ - 18 - ಅಂತಾರಾಷ್ಟ್ರೀಯ ವಿಮಾನನಿಲ್ದಾಣಗಳ ಕೆಲವು ದೃಶ್ಯಾವಳಿಗಳು

ನಮ್ಮ ಬೆಂಗಳೂರಿನ ಅಂತಾರಾಷ್ಟ್ರೀಯ ವಿಮಾನನಿಲ್ದಾಣದ ಒಳಗಿನ ಕೆಲವು ದೃಶ್ಯಾವಳಿಗಳು

ಜಗತ್ತಿನಲ್ಲಿ ಅತ್ಯುತ್ತಮವಾದ ಮತ್ತು ಬೃಹತ್ತಾದ ಸಿಂಗಪೂರ್ ನ "ಚಾಂಗೀ ಅಂತಾರಾಷ್ಟ್ರೀಯ ವಿಮಾನನಿಲ್ದಾಣ"ದ ಒಳಗಿನ ಕೆಲವು ದೃಶ್ಯಾವಳಿಗಳು.

ವಿಮಾನದಿಂದ ಇಳಿಯುತ್ತಿದ್ದಂತೆಯೇ ನೆಲವೇ ಕಾಣಿಸದಂತೆ ಹಾಸಿದ ಕಾರ್ಪೆಟ್ ನಮ್ಮನ್ನು ಸ್ವಾಗತಿಸುತ್ತದೆ. ಝಗಮಗಿಸುವ ಲೈಟುಗಳು ನಮ್ಮ ಕಣ್ಣನ್ನು ಕೋರೈಸುತ್ತವೆ.ಸಿಂಗಪೂರ್ ವಿಮಾನ ನಿಲ್ದಾಣ ಒಂದು ರೀತಿ ಮಿನಿ ಪ್ರಪಂಚವಿದ್ದಂತೆ.ಎಲ್ಲಾ ದೇಶದ ಜನರನ್ನೂ ಇಲ್ಲಿ ನೋಡಬಹುದು.ವಿಶ್ವದ ದೊಡ್ಡ ಏರ್ ಪೋರ್ಟ್ ಗಳಲ್ಲಿ ಒಂದಾದ ಇಲ್ಲಿ ಒಂದು ಟರ್ಮಿನಲ್ ನಿಂದ ಇನ್ನೊಂದು ಟರ್ಮಿನಲ್ ಗೆ ಹೋಗಲು ಸ್ಕೈ ಟ್ರೈನ್ ವ್ಯವಸ್ಥೆ ಇದೆ. ಒಂದೊಂದು ಟರ್ಮಿನಲ್ ಗಳಲ್ಲೂ ಅನೇಕ ಗೇಟ್ ಗಳಿರುವುದರಿಂದ ಕಿಲೋಮೀಟರ್ ಗಟ್ಟಲೆ ನಡೆಯಬೇಕಾಗುತ್ತದೆ.ಪ್ರಯಾಣಿಕರ ಈ ತೋದರೆಯನ್ನು ನಿವಾರಿಸಲು ಎಸ್ಕಲೇಟರ್ (ಚಲಿಸುವ ಪಥ ಅಥವ ಸೋಪಾನ ಪಥ ಎನ್ನಬಹುದು)  ವ್ಯವಸ್ಥೆ ಮಾಡಿದ್ದಾರೆ. ಇದರಿಂದಾಗಿ ನಮ್ಮ ಲಗ್ಗೇಜುಗಳನ್ನು ಹಿಡಿದು ನಮ್ಮ ಗೇಟ್ ಬಳಿಗೆ ಹೋಗಲು ತುಂಬಾ ಸಹಾಯವಾಗುತ್ತದೆ.

ಸಾಮಾನ್ಯವಾಗಿ ಬೇರೆ ಯಾವುದೇ ವಿಮಾನ ನಿಲ್ದಾಣಗಳಲ್ಲಿ ನಾವು ಬಳಸುವ ಅಂತರ್ಜಾಲಕ್ಕೆ ದುಬಾರಿ ಬೆಲೆ ತೆರಬೇಕಾಗುತ್ತದೆ.  ಆದರೆ ಇಲ್ಲಿ ಇಂಟರ್ ನೆಟ್ ಬಳಸುವವರಿಗಾಗಿ ಉಚಿತ ಕಂಪ್ಯೂಟರ್ ವ್ಯವಸ್ಥೆ ಇದೆ. ಮಕ್ಕಳಿಗೆ ಸಮಯ ಕಳೆಯಲು ಆಟಗಳಿವೆ ಮತ್ತು ಶಾಪಿಂಗ್ ಮಾಡಲೂಬಹುದು. ಇಲ್ಲಿನ ಟಾಯ್ಲೆಟ್ ಮತ್ತು ಬಾತ್ ರೂಂ ಗಳ ಶುಚಿತ್ವದ ಬಗ್ಗೆಯಂತೂ ಎಷ್ಟು ವರ್ಣಿಸಿದರೂ ಕಡಿಮೆಯೇ. ಎತ್ತ ನೋಡಿದರೂ ಅಚ್ಚುಕಟ್ಟು ಎದ್ದು ಕಾಣುತ್ತದೆ. ಇದೇ ಸಿಂಗಪೂರ್ ನ ವಿಶೇಷತೆ.

ಇದು ಆಸ್ಟೇಲಿಯಾದ ಬ್ರಿಸ್ಬೇನ್ ಅಂತಾರಾಷ್ಟ್ರೀಯ ವಿಮಾನನಿಲ್ದಾಣದ ಒಳಗಿನ ಕೆಲವು ದೃಶ್ಯಾವಳಿಗಳು
  

ಇದು ಆಸ್ಟೇಲಿಯಾದ ಮೆಲ್ಬೋರ್ನ್ ಅಂತಾರಾಷ್ಟ್ರೀಯ ವಿಮಾನನಿಲ್ದಾಣದ ಒಳಗಿನ ಕೆಲವು ದೃಶ್ಯಾವಳಿಗಳು

ಪ್ರಖ್ಯಾತ ಜ್ಯೋತಿಷಿಗಳಾದ ಶ್ರೀ ಸೋಮಯಾಜಿಯವರು ನಾವು ಹೊರಟ ವಿಮಾನದಲ್ಲಿ ಪ್ರಯಾಣಿಸಿದ್ದೊಂದು ವಿಶೇಷ.ಅವರೊಡನೆ ಮಾತನಾಡುವ ಅವಕಾಶ ನಮಗೆ ಇಲ್ಲಿ ಸಿಕ್ಕಿತು.

ಇದು ಆಸ್ಟೇಲಿಯಾದ ಟೌನ್ಸ್ವಿಲ್ ನ ಡೊಮೆಸ್ಟಿಕ್ ವಿಮಾನನಿಲ್ದಾಣದ ಒಳಗಿನ ಕೆಲವು ದೃಶ್ಯಾವಳಿಗಳು.

ಇದು ನಮ್ಮ ಮಗಳಿರುವ ಸ್ಥಳವಾದ್ದರಿಂದ ಇಲ್ಲಿ ಕಾಲಿಡುತ್ತಿರುವಂತೆಯೇ ಒಂದು ರೀತಿಯ ಆತ್ಮೀಯ ಭಾವ ಮೂಡಿದ್ದು ಮಾತ್ರ ನಿಜ. ಹಾಗೆಯೇ ವಾಪಾಸಾಗುವಾಗ ಅಳಿಯ-ಮಗಳಿಗೆ ವಿದಾಯ ಹೇಳುವ ಸಮಯದಲ್ಲಿ ಕಣ್ತುಂಬಿ ಬಂದು ಎದೆ ಭಾರವಾಗಿತ್ತು.

ವಿದೇಶ ವಿಹಾರ 17- ಅಂತರರಾಷ್ಟ್ರೀಯ ವಿಮಾನದೊಳಗೆ ಹೇಗಿರಬಹುದು...?!!ಏನಿರಬಹುದು..?!!

ವಿಮಾನ ನಿಲ್ದಾಣಕ್ಕೆ ಆಗಮಿಸಿದ್ದ ನಮ್ಮ ಆಪ್ತರಿಂದ ಬೀಳ್ಕೊಂಡು,ಒಳಗೆ ಪ್ರವೇಶಿಸುತ್ತಿದ್ದಂತೆಯೇ ಚೆಕ್-ಇನ್ ಪ್ರಕ್ರಿಯೆ ಪ್ರಾರಂಭವಾಗುತ್ತದೆ.ಇದು ನಮ್ಮೂರಿನಲ್ಲಿ ಬಸ್ಸು,ರೈಲುಗಳನ್ನು ಹತ್ತಿದಂತೆ ಸುಲಭವಲ್ಲ...!! ಸಾಮಾನ್ಯವಾಗಿ ಒಂದೆರಡು ಗಂಟೆಗಳನ್ನು ತೆಗೆದುಕೊಳ್ಳುತ್ತದೆ. ನಮಗೆ ನಿಗದಿತವಾದ ಕೌಂಟರಿನಲ್ಲಿ ನಮ್ಮ ಪಾಸ್ ಪೋರ್ಟ್, ಏರ್ ಟಿಕೆಟ್ ಮತ್ತು ನಮ್ಮ ಲಗ್ಗೇಜುಗಳನ್ನು ತಪಾಸಣೆ ಮಾಡುತ್ತಾರೆ.ನಮ್ಮ ಕ್ಯಾರಿ ಬ್ಯಾಗ್, ವ್ಯಾನಿಟಿ ಬ್ಯಾಗ್ ಗಳನ್ನು ಮತ್ತು ಪ್ರತಿ  ಪ್ರಯಾಣಿಕರನ್ನೂ ಭದ್ರತಾ ತಪಾಸಣೆಗೆ ಒಳಪಡಿಸಲಾಗುತ್ತದೆ.ಇದೆಲ್ಲವೂ ಓಕೆ ಆದಮೇಲೆ ಇಮ್ಮಿಗ್ರೇಶನ್ ಸರ್ಟಿಫಿಕೇಟ್ ಕೊಡಲಾಗುತ್ತದೆ.ಇದಿಷ್ಟೂ ಮುಗಿದ ನಂತರವಷ್ಟೇ ನಮಗೆ ಬೋರ್ಡಿಂಗ್ ಪಾಸ್ ನೀಡುತ್ತಾರೆ. ಇಲ್ಲಿಗೆ ನಮ್ಮ ಚೆಕ್ ಇನ್ ಪ್ರಕ್ರಿಯೆ ಅಂತ್ಯಗೊಂಡು ಸಮಾಧಾನವಾಗುತ್ತದೆ.

ಈಗ ನಮ್ಮ ವಿಮಾನ ಹತ್ತುವ ಗೇಟ್ ನಲ್ಲಿ ವ್ಯವಸ್ಥೆ ಮಾಡಿರುವ ಆಸನಗಳಲ್ಲಿ ಕಾದು ಕುಳಿತು ನಮ್ಮ ಸರದಿ ಬಂದಾಗ ಏರೋಬ್ರಿಜ್ ಮೂಲಕ ಹಾದು ವಿಮಾನದೊಳಗೆ ಪ್ರವೇಶಿಸುತ್ತೇವೆ.ನಾವು ಪ್ರಯಾಣಿಸಿದ್ದು ಸಿಂಗಪೂರ್ ಏರ್ ಲೈನ್ಸಿನಲ್ಲಿ. ನಾವು ಪ್ರಯಾಣಿಸಿದ ವಿಮಾನದಲ್ಲಿ ಸುಮಾರು ೩೫೦ ರಿಂದ ೪೦೦ ಜನ ವಿಮಾನಯಾನ ಮಾಡಬಹುದಾದಷ್ಟು ದೊಡ್ಡದು. ವಿಮಾನದ ದ್ವಾರದಲ್ಲಿಯೇ ಸಿಂಗಾಪೂರ್ ಸುಂದರಿಯರಾದ ಗಗನಸಖಿಯರು ನಗುಮೊಗದಿಂದ ನಮ್ಮನ್ನು  ಸ್ವಾಗತಿಸಿ, ನಮ್ಮ ಆಸನಗಳನ್ನು ಹುಡುಕಲು ಮತ್ತು ನಮ್ಮ ಕ್ಯಾರಿ ಬ್ಯಾಗುಗಳನ್ನು ಮೇಲಿಡಲು ಸಹಾಯ ಮಾಡುತ್ತಾರೆ.

ವಿಮಾನದೊಳಗಿನ ಸ್ವಚ್ಚವಾದ ವಾತಾವರಣ, ಸುಸಜ್ಜಿತವಾದ ಪುಶ್ ಬ್ಯಾಕ್ ಆಸನಗಳ ವ್ಯವಸ್ಥೆ ನಮ್ಮ ಮನಸ್ಸನ್ನು ಮುದಗೊಳಿಸುತ್ತದೆ.ಸರಿ ಸುಮಾರು ಅರ್ಧ ದಿನವೆಲ್ಲಾ ವಿಮಾನದಲ್ಲಿಯೇ ಕಾಲ ಕಳೆಯಬೇಕಾಗುವುದರಿಂದ ತನ್ನ ಪ್ರಯಾಣಿಕರನ್ನು ಸಂತೋಷವಾಗಿಡಲು ಬೇಕಾದ ಇಲ್ಲಾ ಐಶಾರಾಮಿ ವ್ಯವಸ್ಥೆಯೂ ಇಲ್ಲಿದೆ.ವಿಮಾನ ಮೇಲೇರುವ ಮುನ್ನ ಪ್ರಯಾಣಿಕರಿಗೆ ಕೆಲವು ಸೂಚನೆಗಳನ್ನು (ಬೆಲ್ಟ್ ಉಪಯೋಗಿಸುವುದು ಮತ್ತು ತುರ್ತು ಸಂದರ್ಭದಲ್ಲಿ ಪ್ರಯಾಣಿಕರು ಅನುಸರಿಸಬೇಕಾದ ಕೆಲವು ಅಗತ್ಯ ನಿಯಮಗಳ ಬಗ್ಗೆ)  ವೀಡಿಯೋ ಮೂಲಕ ಮತ್ತು ಸ್ವತಃ ಗಗನಸಖಿ ತಿಳಿಸಿಕೊಡುತ್ತಾರೆ.ಒಮ್ಮೆ ವಿಮಾನ ಮೇಲೇರಿತೆಂದರೆ ಗಗನಸಖಿಯರ ಚಟುವಟಿಕೆ ಶುರು. ನಮ್ಮ ಮುಖ,ಕೈಗಳನ್ನು ಒರೆಸಲು ಹಬೆಯಾಡುತ್ತಿರುವ ಶುಭ್ರ ಬಿಳಿಯ ಚಿಕ್ಕಚಿಕ್ಕ ಟವೆಲ್ಲುಗಳನ್ನು ಪ್ರತಿಯೊಬ್ಬರಿಗೂ ಕೊಡಲಾಗುತ್ತದೆ. ಏ ಸಿ ವ್ಯವಸ್ಥೆ ಇರುವುದರಿಂದ ಹೊದೆಯಲು ರಗ್ಗು,ಕಾಲಿಗೆ ಹಾಕಿಕೊಳ್ಳಲು ಸಾಕ್ಸ್,ನೀರಿನ ಬಾಟಲ್, ಟೀವಿ ಕೇಳಲು ಇಯರ್ ಫೋನ್ ಗಳನ್ನು ಕೊಡುತ್ತಾರೆ.ತಿಂಡಿ ಸಮಯಕ್ಕೆ ತಿಂಡಿ ,ಊಟದ ವೇಳೆಗೆ ಊಟದ ವ್ಯವಸ್ಥೆಯಿರುತ್ತದೆ. ಇವುಗಳ ನಡುವೆ ಬಾಯಾಡಿಸಲು ಕಾರದ ಗೋಡಂಬಿ,ಕಡ್ಲೆಬೀಜ,ಚಾಕೋಲೇಟುಗಳ ಜೊತೆಗೆ ಜ್ಯೂಸ್,ಕಾಫಿ,ಟೀ ಮುಂತಾದುವುಗಳನ್ನು ಗಗನಸಖಿಯರು ಬಿಡುವಿಲ್ಲದಂತೆ ಒದಗಿಸುತ್ತಿರುತ್ತಾರೆ. ಅಗತ್ಯವಿರುವವರಿಗೆ ಡ್ರಿಂಕ್ಸ್ ವ್ಯವಸ್ಥೆ ಸಹ ಇರುತ್ತದೆ. ಇಂಟರ್ ನ್ಯಾಷನಲ್ ಫ಼್ಲೈಟ್ ಗಳಲ್ಲಿ ಇವುಗಳಿಗೆಲ್ಲಾ ಪ್ರತ್ಯೇಕ ಶುಲ್ಕವಿರುವುದಿಲ್ಲ...!!.ಹಾಗಂತ ಫ಼್ರೀ ಅಂತ ತಿಳಿಬೇಡಿ..!! ಟಿಕೇಟಿನಲ್ಲಿ ಎಲ್ಲಾ ಶುಲ್ಕಗಳನ್ನೂ ಸೇರಿಸಿರುತ್ತಾರೆ ಅಷ್ಟೇ...!!ಆದರೆ ಡೊಮ್ಯಾಸ್ಟಿಕ್  ಫ಼್ಲೈಟ್ ಗಳಲ್ಲಿ ಒಂದು ಚಿಕ್ಕ ನೀರಿನ ಬಾಟಲಿಗೂ ದುಬಾರಿ ಬೆಲೆ ತೆರಬೇಕಾಗುತ್ತದೆ.ಇದಿಷ್ಟೇ ಅಲ್ಲದೇ ,ನಿಗದಿತ ಹಣ ಸಂದಾಯ ಮಾಡಿದರೆ ಚಿಕ್ಕ ಮಕ್ಕಳಿಗೆ ಮಲಗಿಸಲು ತೊಟ್ಟಿಲು, ವಯಸ್ಸಾದವರಿಗಾಗಿ ಮತ್ತು ಅನಾರೋಗ್ಯ ಪೀಡಿತರಿಗೆ ಮಲಗಲು ವ್ಯವಸ್ಥೆಯೂ ಇರುತ್ತದೆ. 

ವಿಮಾನದೊಳಗೆ ನಾ ಕಂಡ ಕೆಲವು ವಿಶೇಷತೆಗಳ ಕಿರು ಪರಿಚಯ:-

ಸಿಂಗಪೂರ್ ಏರ್ಲೈನ್ಸ್ ನ ವಿಮಾನದೊಳಗಿನ ದೃಶ್ಯವಿದು. ಆರಾಮದಾಯಕವಾದ ಆಸನಗಳು. ಸೀಟಿನ ಮೇಲ್ಗಡೆ ಕಾಣುವುದು ನಮ್ಮ ಕ್ಯಾಬಿನು ಬ್ಯಾಗುಗಳನ್ನು ಇಡಲು ವ್ಯವಸ್ಥೆ.ನಮ್ಮ ಮುಂದಿನ ಸೀಟಿನ ಹಿಂಭಾಗದಲ್ಲಿ ಟಿವಿಯ ವ್ಯವಸ್ಥೆ ಇದೆ.ಇದರಲ್ಲಿ ಬರೋಬ್ಬರಿ ನೂರಕ್ಕಿಂತಾ ಹೆಚ್ಚು ಚಾನಲ್ಲುಗಳು ಬರುತ್ತದೆ!! ನಗುವನ್ನು ಸೂಸುತ್ತಾ ಮಾರ್ಗದರ್ಶನ ನೀಡುತ್ತಿರುವ ಸಿಂಗಪೂರ್ ಗಗನಸಖಿಯರನ್ನೂ ಇಲ್ಲಿ ಕಾಣಬಹುದು.

ವಿಮಾನದಲ್ಲಿ ನಮಗಾಗಿ ನೀಡಿದ ಊಟದ ಚಿತ್ರ.ಹಾಲು,ಮೊಸರು,ಬೆಣ್ಣೆ,ಹಪ್ಪಳ,ರೈಸ್ ,ಸಾಂಬಾರ್,ಸಕ್ಕರೆ,ತರಕಾರಿ ಸಲಾಡ್,ಬನ್ ಪ್ರತಿಯೊಂದೂ ಪ್ಯಾಕಿಂಗ್ ಆಗಿರುವ ಪರಿ ನೋಡಿ.

ಪ್ರತಿಯೊಬ್ಬರಿಗೂ ಟಿವಿ ಮತ್ತು ಇಯರ್ ಫೋನ್ ಇರುತ್ತದೆ.ನಮ್ಮ ಆಸಕ್ತಿಗೆ ಅನುಗುಣವಾಗಿ ನಮಗೆ ಬೇಕಾದ ಚಾನಲ್ಲನ್ನು ನೋಡುತ್ತಾ ಸಮಯ ಕಳೆಯಬಹುದು.ಸುಮಾರು ನೂರು ಚಾನಲ್ಲುಗಳಿರುತ್ತದೆ.ಇದರಲ್ಲಿ ಹಿಂದಿ ಸಿನಿಮಾ ಚಾನಲ್ಲುಗಳೂ ಇದ್ದವು.ಬೆಂಗಳೂರಿನಿಂದ ಹೊರಡುವ ಮತ್ತು ಇಲ್ಲಿಗೆ ಬರುವ ವಿಮಾನಗಳಲ್ಲಿ ಕನ್ನಡ ಚಾನಲ್ಲುಗಳನ್ನು ಸೇರಿಸಬೇಕೆಂಬ ಬೇಡಿಕೆಯನ್ನು ಇಟ್ಟಿದ್ದಾರೆಂದು ಕೇಳಿದೆ.ಹಾಗಾದಲ್ಲಿ ಮುಂದೆ ಎಲ್ಲಾ ಅಂತರಾಷ್ಟ್ರೀಯ ವಿಮಾನಗಳಲ್ಲೂ ಕನ್ನಡ ಕಾರ್ಯಕ್ರಮಗಳನ್ನು ನೋಡುವ ಅವಕಾಶ ಸದ್ಯದಲ್ಲೇ ಒದಗಿ ಬರಬಹುದು.

ವಿಮಾನದೊಳಗೆ ಟಾಯ್ಲೆಟ್ ಮತ್ತು ವಾಶ್ ಬೇಸಿನ್ ವ್ಯವಸ್ಥೆಯ ಒಂದು ನೋಟ.



ಇಲ್ಲಿನ ಟಿವಿ ಚಾನಲ್ಲಿನಲ್ಲಿ ನಮ್ಮ ಪ್ರಯಾಣದ ಕ್ಷಣ ಕ್ಷಣದ ಮಾಹಿತಿ ನೀಡುವ "ಫ್ಲೈಟ್ ಪಾತ್" ಚಾನಲ್ ನನಗೆ ತುಂಬಾ ಮೆಚ್ಚುಗೆಯಾಯಿತು.

ಈಗ ನಾವೆಲ್ಲಿದ್ದೇವೆ,ಭೂಮಿಯಿಂದ ಎಷ್ಟು ಎತ್ತರದಲ್ಲಿ ಹಾರುತ್ತಿದ್ದೇವೆ,ನಾವು ತಲುಪಬೇಕಾದ ಸ್ಥಳಕ್ಕೆ ಇರುವ ದೂರವೇನು,ಅಲ್ಲಿನ ಸಮಯ ಮತ್ತು ನಾವಿರುವ ಪ್ರದೇಶದಲ್ಲಿ ಆಗಿರುವ ಸಮಯ ಎಲ್ಲ ವಿವರವನ್ನೂ ನಾವಿಲ್ಲಿ ತಿಳಿದುಕೊಳ್ಳಬಹುದು.ನನಗೆ ಇದು ತುಂಬಾ ಹಿಡಿಸಿತು.

ಬೆಳಗಿನಜಾವ ಐದೂವರೆ ಸಮಯದಲ್ಲಿ ನಾವು ಸಿಂಗಪೂರ್ ನಲ್ಲಿ ಲ್ಯಾಂಡ್ ಆಗುವ ಮೊದಲು, ವಿಮಾನದ ಮೇಲಿನಿಂದ ಸಿಂಗಪೂರ್ ಎಂಬ ಸುಂದರ ದೇಶ ನನ್ನ ಕ್ಯಾಮರಾದಲ್ಲಿ ಸೆರೆಯಾಗಿದ್ದು ಹೀಗೆ.

 ದೊಡ್ಡದಾದ,ಅತ್ಯಾಧುನಿಕವಾದ,ಸುಸಜ್ಜಿತವಾದ,ವ್ಯವಸ್ಥಿತವಾದ ಮತ್ತು ನೆಲವೇ ಕಾಣದಂತೆ ಕಾರ್ಪೆಟು ಹಾಸಿ ವಿಶ್ವದ ಎಲ್ಲಾ ಭಾಗದ ಜನರನ್ನೂ ಸ್ವಾಗತಿಸುವ ಸಿಂಗಪೂರ್ ನ "ಚಾಂಗಿ ಏರ್ಪೋರ್ಟ್" ನ ವೈಭವವನ್ನು ಸಾರುವ ಕೆಲವೇ ಕೆಲವು ದೃಶ್ಯಗಳು.

ಗಗನಸಖಿ ಎಂದರೆ ಚೆಂದವಾಗಿ ಅಲಂಕರಿಸಿಕೊಂಡು ವಿಮಾನದಲ್ಲಿ ಅಲ್ಲಿಂದಿಲ್ಲಿಗೆ ಓಡಾಡುವ ಸುಂದರ ಬೊಂಬೆಗಳು ಎಂದು ತಿಳಿದಿದ್ದೆ. ಆದರೆ ಬೆಂಗಳೂರಿನಿಂದ ಹೊರಟು ಸಿಂಗಪೂರ್ ತಲುಪುವ ವೇಳೆಗೆ ನನ್ನ ಈ ಅಭಿಪ್ರಾಯ ಬದಲಾಗಿತ್ತು....!! ಅವರು ತಮ್ಮ ಡ್ಯೂಟಿ ವೇಳೆಯಲ್ಲಿ ಪ್ರಯಾಣಿಕರ ಸೇವೆಯೇ ತಮ್ಮ ಕರ್ತವ್ಯ ಎಂದು ತಿಳಿದಿರಬೇಕು.ಎಲ್ಲಾ ವಿಮಾನ ಸಂಸ್ಥೆಗಳೂ ತನ್ನ ಪ್ರಯಾಣಿಕರನ್ನು ಸಂತಸದಿಂದಿಡಲು ಮತ್ತು ಅವರಿಗೆ ಅಗತ್ಯ ಸೌಲಭ್ಯಗಳನ್ನು ಒದಗಿಸುವತ್ತ ಹೆಚ್ಚಿನ ಮಹತ್ವ ನೀಡುತ್ತವೆ. ಗಗನಸಖಿ ಎಂದರೆ ಸಂಸ್ಥೆ ಮತ್ತು ಪ್ರಯಾಣಿಕರ ನಡುವಿನ ಕೊಂಡಿಯಂತೆ. ಸಂಸ್ಥೆಯ ಹಿರಿಮೆಯನ್ನು ಎತ್ತಿ ಹಿಡಿಯುವ ಕೆಲಸವನ್ನು ಈ ಗಗನಸಖಿಯರು ಮಾಡಬೇಕು

ಹಾಗಾಗಿ ತನ್ನ ಕೆಲಸದ ವೇಳೆಯಲ್ಲಿ ನಗುಮೊಗದಿಂದ ಕೂಡಿದ ಸೌಜನ್ಯಯುತ ನಡವಳಿಕೆಯನ್ನು ಬೆಳೆಸಿಕೊಳ್ಳಬೇಕಾಗುತ್ತದೆ.ಬೇಸರಿಸದೇ, ಸಿಡಿಮಿಡಿಗೊಳ್ಳದೇ ಪ್ರತಿಯೊಬ್ಬ ಪ್ರಯಾಣಿಕರ ಕರೆಗೆ ತತ್ ಕ್ಷಣ ಓಗೊಡಬೇಕಾಗುತ್ತದೆ. ಚೈತನ್ಯದ ಚಿಲುಮೆಯಂತೆ  ತಮ್ಮ ಕೆಲಸದಲ್ಲಿ ಚುರುಕಾಗಿರಬೇಕಾಗುತ್ತದೆ.ತನ್ನ ಪ್ರಯಾಣಿಕರಿಗೆ ಸಹಾಯ ಹಸ್ತ ನೀಡಬೇಕಾಗುತ್ತದೆ. ಗಗನಸಖಿಯರೇ, ನಿಮಗೊಂದು ನನ್ನ ಸೆಲ್ಯೂಟ್...!

ವಿಮಾನ ಭೂಸ್ಪರ್ಶವಾದ ನಂತರ ಗಗನಸಖಿಯರಿಂದ ಶುಭ ವಿದಾಯವನ್ನು ಸ್ವೀಕರಿಸಿ, ವಿಮಾನದಿಂದಿಳಿದು ನಮ್ಮ ಲಗ್ಗೇಜುಗಳನ್ನು ತೆಗೆದುಕೊಳ್ಳುವಲ್ಲಿಗೆ ಹೋಗಿ, ನಮ್ಮ ಸೂಟ್ಕೇಸುಗಳನ್ನು ತಳ್ಳುಗಾಡಿಯಲ್ಲಿರಿಸಿಕೊಂಡರೆ ನಮ್ಮ ಅರ್ಧ ಕೆಲಸವಾದಂತೆ. ಮುಂದೆ ಆ ದೇಶದ ಕಸ್ಟಮ್ಸ್ ನವರಿಂದ ಲಗ್ಗೇಜುಗಳ ಪರಿಶೀಲನೆ ನಡೆಯುತ್ತದೆ. ನಾವು ತಂದಿರುವ ಎಲ್ಲಾ ವಸ್ತು ಮತ್ತು ತಿಂಡಿಗಳನ್ನೂ ಚೆಕ್ ಮಾಡಿ ನೋಡುತ್ತಾರೆ. ಕೆಲವೊಮ್ಮೆ ಉಪ್ಪಿನಕಾಯಿ,ಮಸಾಲೆ ಪದಾರ್ಥಗಳನ್ನು ಡಸ್ಟ್ ಬಿನ್ನಿಗೆ ಎಸೆಯುವುದೂ ಇರುತ್ತದೆ.ಇಲ್ಲಿ ಲಗ್ಗೇಜ್ ತಪಾಸಣೆ ಮುಗಿಸಿದರೆ ನಾವು ವಿದೇಶದಲ್ಲಿರುವ ನಮ್ಮವರಿಗಾಗಿ ಅತಿ ಮುತುವರ್ಜಿಯಿಂದ ತಂದ ವಸ್ತುಗಳೆಲ್ಲಾ ಅವರಿಗೆ ತಲುಪಿದಂತೆಯೇ..!! ಇವೆಲ್ಲವನ್ನು ಮುಗಿಸಿದ ನಂತರವಷ್ಟೇ ನಾವು ವಿಮಾನ ನಿಲ್ದಾಣದಿಂದ ಹೊರಬರಬಹುದು.