ಹಚ್ಚೋಣ ಹಣತೆ

. 

ಬೆಲ್ಲದಂತಹ ಬದುಕು | ಬಲ್ಲಿದರ ಒಡನಾಟ |

ಎಲ್ಲ ಭಾಗ್ಯವ ಕೊಟ್ಟ ಗಣಪಗೆ | ನಮಿಸುತ್ತ

ಎಲ್ಲರೂ ಬೆಳಗೋಣ ಹಣತೆಯೊಂದ |

ಪದವಿಡಲು ನೆಲೆಯಿತ್ತು | ವಿಧವಿಧದ ಬೆಳೆ ಕೊಟ್ಟು |

ಬದುಕಿಗಾಸರೆಯಾದ ತಾಯಿ | ಭೂದೇವಿಗೆ

ಮುದದಲಿ  ಬೆಳಗೋಣ ಹಣತೆಯೊಂದ |

ಹೆತ್ತ ತಾಯಿಯ ಸ್ಮರಿಸಿ | ಪಿತನ ಪಾದಕೆ ನಮಿಸಿ|

ಮತ್ತೆ  ತಿದ್ದಿದ ಗುರುವಿಗೆ | ವಂದಿಸುತ

ಕೂತಲ್ಲೇ ಹಚ್ಚೋಣ ಹಣತೆಯೊಂದ |

ಮಕ್ಕಳಿಗೆ ಹಾಲಿತ್ತು | ಒಕ್ಕಲಿಗೆ ಸಗಣಿಯಿಟ್ಟು|

ಮುಕ್ಕೋಟಿ ದೇವತೆಯ ನೆಲೆಯಾದ | ಗೋಮಾತೆಗೆ 

ಅಕ್ಕರೆಯಲಿ ಹಚ್ಚೋಣ ಹಣತೆಯೊಂದ |

#ಸರ್ವರಿಗೂ ದೀಪಾವಳಿಯ ಶುಭಾಶಯಗಳು. #

ಪ್ರಾರ್ಥನೆ

ಕರಗಳನು ಮುಗಿಯುವೆವು

ಶಿರಬಾಗಿ ನಮಿಸುವೆವು

ವಿದ್ಯಾಧಿದೇವತೆಯೆ ನೀನೊಲಿದು ಬಾರೆ||

ಜ್ಞಾನ ತುಂಗೆಯ ಹರಿಸಿ

ಸಂಗೀತ ಕಲೆ ಬೆಳೆಸಿ

ಕರುಣೆಯಿಂದಲಿ ಕಾಯೇ ಶಾರದಾಮಾತೆ ||

ಎಂದಿನಂತೆಯೆ ಇಂದೂ

“ಮಧುರವಾಣಿ”ಯ ಕುಸುಮ

ಚರಣದಲಿ ಅರ್ಪಿತವು  ಹರಸು  ತಾಯೇ ||