ಇತ್ತೀಚಿನ ವರ್ಷಗಳಲ್ಲಿ ಪ್ರಪಂಚದಾದ್ಯಂತ ಮಹಿಳೆಯರು ಪ್ರತಿಯೊಂದು ಕ್ಷೇತ್ರದಲ್ಲಿಯೂ ತಮ್ಮ ಪ್ರತಿಭೆಯನ್ನು, ಸಾಮರ್ಥ್ಯವನ್ನು ಮೆರೆದು ಮೆಚ್ಚುಗೆಯನ್ನು ಪಡೆಯುತ್ತಿರುವುದು ಹೆಮ್ಮೆಯ ವಿಷಯ.ತೊಟ್ಟಿಲು ತೂಗುವ ಕೈ ದೇಶವನ್ನೂ ಆಳಬಲ್ಲದು ಎಂಬ ಮಾತು, ದೈಹಿಕವಾಗಿ ಪುರುಷನಿಗಿಂತ ಬಲಹೀನಳಾದ ಹೆಣ್ಣು ಸಂದರ್ಭ ಒದಗಿದಾಗ ಎಂಥಹ ಕೆಲಸವನ್ನಾದರೂ ನಿರ್ವಹಿಸುವ ಜಾಣ್ಮೆಯನ್ನು ಹೊಂದಿದ್ದಾಳೆ ಎನ್ನುವುದನ್ನು ಬಿಂಬಿಸುತ್ತದೆ.ಅಡುಗೆ ಮನೆಯಲ್ಲಿ ಆಧುನಿಕ ಸೌಲಭ್ಯಗಳು ಲಭ್ಯವಿರುವ ಇಂದಿನ ದಿನಗಳಲ್ಲಿ ಹೆಣ್ಣು ಮನೆಯಲ್ಲಿಯೇ ಕುಳಿತು ವ್ಯರ್ಥವಾಗಿ ಕಾಲಕಳೆಯುವುದು ಸಮಂಜಸವೂ ಅಲ್ಲ.
ಈ ಮಾತಿಗೆ ಭಾರತೀಯರಂತೆ ಆಸ್ಟ್ರೇಲಿಯಾ ದೇಶದ ಮಹಿಳೆಯರೂ ಹೊರತಲ್ಲ.ಇಲ್ಲಿನ ಹೆಣ್ಣು ತನ್ನ ಕುಟುಂಬವನ್ನು ನೋಡಿಕೊಳ್ಳುವುದರೊಂದಿಗೆ ತನ್ನ ಬೌದ್ಧಿಕ ಮಟ್ಟಕ್ಕೆ ಹೊಂದುವ ಯಾವುದಾದರೂ ದುಡಿಮೆಯಲ್ಲಿ ತನ್ನನ್ನು ತೊಡಗಿಸಿಕೊಂಡಿರುವುದು ನನ್ನ ಗಮನಕ್ಕೆ ಬಂದಿತು.ಈ ದೇಶದ ನಾರಿ ಇಲ್ಲಾ ಕೆಲಸಗಳಿಗೂ ರೆಡಿ.ಯಾವುದೇ ಕೆಲಸವನ್ನು ಸಮರ್ಪಕವಾಗಿ ಮಾಡಿ ಮುಗಿಸುವ ಮನೋಭಾವವನ್ನು ಇಲ್ಲಿನ ಸ್ತ್ರೀಯರಲ್ಲಿ ಕಂಡೆ!!!!
ಇಲ್ಲಿನ ಮಹಿಳಾಮಣಿಗಳು ದುಡಿಯದ ಕ್ಷೇತ್ರವಿಲ್ಲ ಎನ್ನಬಹುದು.
ಆಸ್ಟ್ರೇಲಿಯಾದ ಮಹಿಳೆ ದೇಶದ ಆಡಳಿತ ಚುಕ್ಕಾಣಿಯನ್ನು ಹಿಡಿದು ದೇಶವನ್ನು ಸಮರ್ಥವಾಗಿ ಮುನ್ನೆಡೆಸುವ ಜವಾಬ್ದಾರಿಯಿಂದ ಹಿಡಿದು ಪ್ರತಿ ಕಾರ್ಯ ಕ್ಷೇತ್ರದಲ್ಲಿಯೂ ತನ್ನ ಛಾಪನ್ನು ಮೂಡಿಸಿದ್ದಾಳೆ ಎನ್ನಬಹುದು.
ಏಕೆಂದರೆ ಆಸ್ಟ್ರೇಲಿಯಾ ದೇಶದ ಈಗಿನ
ಪ್ರಧಾನಮಂತ್ರಿ ಓರ್ವ ಮಹಿಳೆ.ಇಲ್ಲಿನ ಮಹಿಳೆಯರ ಸಾಮರ್ಥ್ಯಕ್ಕೆ ಇದು ಒಂದು ನಿದರ್ಶನ.
ಪ್ರತಿಷ್ಟಿತ ಕಂಪನಿಗಳ ಉನ್ನತ ಹುದ್ದೆಗಳಲ್ಲಿ,ಸರಕಾರಿ ಇಲಾಖೆಗಳ ಹುದ್ದೆಗಳಲ್ಲಿ ಹೆಣ್ಣುಮಕ್ಕಳೇ ಹೆಚ್ಚಾಗಿ ದುಡಿಯುತ್ತಾರೆ.ಶಾಪಿಂಗ್ ಕಾಂಪ್ಲೆಕ್ಸ್ ಗಳಿರಲಿ,ಏರ್ ಪೋರ್ಟ್ ಗಳಿರಲಿ ದುಡಿಯುವ ಹೆಣ್ಣುಮಕ್ಕಳು ಕಂಡುಬರುತ್ತಾರೆ. ಅಷ್ಟೇ ಅಲ್ಲದೆ ರೆಸ್ಟೋರೆಂಟ್ ಮತ್ತು ಪಬ್ ಮುಂತಾದ ದೊಡ್ಡ ದೊಡ್ಡ ಉದ್ದಿಮೆಗಳನ್ನು ಸ್ವಂತವಾಗಿ ನಿರ್ವಹಿಸಬಲ್ಲ ಪರಿಣತಿ ಇಲ್ಲಿನ ಮಹಿಳೆಯರಿಗಿದೆ.ಹಾಗಾಗಿ ಇಲ್ಲಿನ ಮಹಿಳೆಯರು ವ್ಯವಹಾರ ಚತುರೆಯರು.
ಇಲ್ಲಿ ನಾನು ಗಮನಿಸಿದ ಮತ್ತೊಂದು ಸಂಗತಿಯೆಂದರೆ,ಇಲ್ಲಿನ ಮಹಿಳೆಯರು ದೈಹಿಕವಾಗಿ ಹೆಚ್ಚು ಶ್ರಮವನ್ನು ಬೇಡುವ ಕೆಲಸಗಳಲ್ಲೂ ತಮ್ಮನ್ನು ತೊಡಗಿಸಿಕೊಂಡಿರುವುದು...! ಇದು ನನಗೆ ಅಚ್ಚರಿ ಎನಿಸಿತು.
ಆಸ್ಟ್ರೇಲಿಯನ್ ಮಹಿಳೆಯರು ಭಾರಿ ಟ್ರಕ್ ಗಳನ್ನೂ ಸಹ ಸಲೀಸಾಗಿ ಚಾಲನೆ ಮಾಡುವುದನ್ನು ಕಂಡು ಅಚ್ಚರಿಪಟ್ಟೆ.ದೊಡ್ಡದೊಡ್ಡ ಸಾಮಾನುಗಳನ್ನು ಒರ್ವ ಮಹಿಳೆಯೇ ಸಾಗಿಸುವುದಾಗಲಿ, ಭಾರಿ ಫೆರ್ರಿ(ಲಾಂಚ್ ಗಳು)ಗಳಿಗೆ ಲಂಗರು ಹಾಕಿ ನಿಲ್ಲಿಸುವಂತಹ ಕಷ್ಟದ ಕೆಲಸಗಳನ್ನೂ ಇಲ್ಲಿನ ಮಹಿಳೆ ಲೀಲಾಜಾಲವಾಗಿ ಮಾಡುತ್ತಾಳೆ.ಒಟ್ಟಿನಲ್ಲಿ ದುಡಿಮೆ ಇಲ್ಲಿನವರ ಮಂತ್ರ.
ಇಲ್ಲಿನ ಕೆಲಸಗಳಲ್ಲಿ ಹೆಂಗಸು-ಗಂಡಸೆಂಬ ಭೇದಭಾವವಿಲ್ಲ.ಹೆಚ್ಚಿನ ಗಂಡಸರು ಮೈನಿಂಗ್ ಕೆಲಸಕ್ಕೆ ತಿಂಗಳಗಟ್ಟಲೆ ಹೊರಗೆ ಹೋಗಿ ದುಡಿಯುತ್ತಾರೆ.ನಗರ ಪ್ರದೇಶದಲ್ಲಿ ಶಾಪಿಂಗ್ ಕಾಂಪ್ಲೆಕ್ಸ್ ಗಳಲ್ಲಿ ಮತ್ತು ಇತರೆಡೆಗಳಲ್ಲಿ ಮಹಿಳಾ ಕೆಲಸಗಾರರೇ ಹೆಚ್ಚು.ನಮ್ಮ ಮಗಳು ನೂತನವಾಗಿ ಕಟ್ಟಿರುವ ಮನೆಗೆ ಸೋಫಾಸೆಟ್ ಗಳು,ಫರ್ನಿಚರ್ ಗಳು, ದೊಡ್ಡ ಕಾಟ್ ಗಳು,ರೆಫ್ರಿಜರೇಟರ್ ಇನ್ನು ಅನೇಕ ಗೃಹೋಪಯೋಗಿ ವಸ್ತುಗಳನ್ನು ಬುಕ್ ಮಾಡಿದ್ದರು. ಇವೆಲ್ಲವನ್ನು ಲಾರಿಯಲ್ಲಿ ಲೋಡ್ (ಡ್ರೈವ್ ಕೂಡ) ಮಾಡಿಕೊಂಡು ಬಂದು ನಮ್ಮ ಮನೆಗೆ ತಂದಿಟ್ಟುಕೊಟ್ಟಿದ್ದು ಓರ್ವ ಮಹಿಳೆ....ನಮ್ಮಲ್ಲಾಗಿದ್ರೆ ಇಷ್ಟು ಕೆಲಸಕ್ಕೆ ಕಡಿಮೆಯೆಂದರೂ ಮೂರು ಜನ ಗಂಡಸರಾದರೂ ಬರುತ್ತಾರೆ..!.ಇಲ್ಲಿನ ಈ ಕೆಲಸಗಳಿಗೆ ಅಷ್ಟು ಜನರ ಅವಶ್ಯಕತೆಯೂ ಇರುವುದಿಲ್ಲ.ಲಾರಿಗೆ ವಸ್ತುಗಳನ್ನು ಹಾಕಲು,ಇಳಿಸಲು ಮತ್ತು ಮನೆಯೊಳಗೆ ತಂದಿಡಲು ಬೇಕಾದ ಎರಡು ಗಾಲಿಗಳಿರುವ ಚಿಕ್ಕ ಗಾಡಿಯ ವ್ಯವಸ್ಥೆಯನ್ನು ಅಲ್ಲಿ ಎಲ್ಲೆಡೆಯೂ ಕಾಣಬಹುದು.ಹಾಗಾಗಿ ಈಎಲ್ಲಾ ಕೆಲಸಗಳನ್ನು ಮಹಿಳೆಯರೇ ಸುಲಭವಾಗಿ ನಿರ್ವಹಿಸಬಲ್ಲರು.ಜನಸಂಖ್ಯೆ ಕಡಿಮೆ ಇರುವ ದೇಶಗಳಲ್ಲಿ ಯಂತ್ರಗಳಿಗೆ ಮೊರೆಹೋಗುವುದು ಅನಿವಾರ್ಯ. ಆದರೆ ನಮ್ಮ ದೇಶದಲ್ಲಿ ಮೂರು ಜನರ ಕೆಲಸವನ್ನು ಒಂದು ಯಂತ್ರ ಮಾಡಿದರೆ ದುಡಿಯುವ ಕೈಗಳಿಗೆ ಕೆಲಸ ಒದಗಿಸುವುದು ಹೇಗೆ ಎಂಬ ಪ್ರಶ್ನೆ ನಮ್ಮೆದುರು ನಿಲ್ಲುತ್ತದೆ.ಹಾಗಾಗಿ ಇದನ್ನು ನಮ್ಮ ದೇಶಕ್ಕೆ ಅನ್ವಯಿಸಿಕೊಳ್ಳದಿರುವುದೇ ಒಳ್ಳೆಯದು ಎಂದು ನನ್ನ ಅನಿಸಿಕೆ.
ಇಲ್ಲಿನ ಹೆಣ್ಣು ಸಂಸಾರದ ಜವಾಬ್ದಾರಿಯನ್ನೂ ತಾನೇ ಹೊರುತ್ತಾಳೆ. ತಮ್ಮ ಮಕ್ಕಳ ಲಾಲನೆ ಪಾಲನೆಯಲ್ಲಿ,ಮಕ್ಕಳನ್ನು ಬೆಳೆಸುವುದರಲ್ಲಿ ಮಹಿಳೆಯರು ಗಂಡಸರಿಗಿಂತಾ ಹೆಚ್ಚಿನ ಆಸಕ್ತಿ ವಹಿಸುತ್ತಾರೆ.ನಮ್ಮ ದೇಶದಲ್ಲಿರುವಂತೆ ಇಲ್ಲಿ ಕುಟುಂಬ ಯೋಜನೆ ಎಂಬುದಿಲ್ಲ.ಇಲ್ಲಿನ ಸರಕಾರ ತನ್ನ ದೇಶದ ಜನಸಂಖ್ಯೆಯನ್ನು ಹೆಚ್ಚಿಸುವ ಸಲುವಾಗಿ, ಹೆಚ್ಚು ಮಕ್ಕಳನ್ನು ಪಡೆಯಲು ಪ್ರೋತ್ಸಾಹಿಸುತ್ತದೆ ಮತ್ತು ಎರಡಕ್ಕಿಂತ ಹೆಚ್ಚು ಮಕ್ಕಳನ್ನು ಪಡೆದವರಿಗೆ ಅನೇಕ ಸವಲತ್ತುಗಳನ್ನು ಕೂಡ ಕೊಡುತ್ತದೆ....!!
ಇಲ್ಲಿನ ಮಕ್ಕಳು ಮತ್ತು ಹುಡುಗಿಯರನ್ನು ಒಮ್ಮೆ ನೋಡಿದರೆ ಮತ್ತೆ ಮತ್ತೆ ನೋಡಬೇಕೆನ್ನಿಸುವ ಆಸೆಯಾಗುತ್ತದೆ.ನನಗಂತೂ ಮುದ್ದಾದ ಗೊಂಬೆಗಳನ್ನು ನೋಡಿದಂತೆನಿಸುತ್ತಿತ್ತು.ತಮ್ಮ ಕೆನೆಹಾಲಿನ ಮೈ ಬಣ್ಣಕ್ಕೆ ಚೋಟುದ್ದದ ಡ್ರೆಸ್ ಹಾಕಿಕೊಂಡು,ತಮ್ಮ ಕಪ್ಪುಕೂದಲನ್ನು ಹರಡಿಕೊಂಡು ,ಹೈಹೀಲ್ಡ್ ಚಪ್ಪಲಿ ಧರಿಸಿ ಓಡಾಡುವ ಯುವತಿಯರು ನಮ್ಮ ಕಣ್ತುಂಬುವುದರಲ್ಲಿ ಸಂದೇಹವಿಲ್ಲ.ಒಳ್ಳೆ ರಸಗುಲ್ಲಗಳಂತಿರುವ ಮಕ್ಕಳನ್ನು ನೋಡಿದೊಡನೆ ಕೆನ್ನೆ ಸವರುವ ಮನಸ್ಸಾಗುತ್ತಿತ್ತು.
ಈ ದೇಶದಲ್ಲಿ ಮನೆಗೆಲಸಕ್ಕೆ ಜನ ಸಿಗುವುದು ಕಷ್ಟ.ಸಿಕ್ಕರೂ ದುಬಾರಿ ಸಂಬಳ ನೀಡಬೇಕು.ಗಂಟೆಗೆ ಮೂವತ್ತು ಡಾಲರುಗಳನ್ನು (ಅಂದರೆ ನಮ್ಮ ದೇಶದ ರೂಪಾಯಿಯಂತೆ ೧೫೦೦/-) ಪಾವತಿಸಬೇಕಾಗುತ್ತದೆ.
ನನ್ನ ಮಗಳ ಮನೆಗೆ ಕೆಲಸ ಮಾಡಿಕೊಡಲು ವಯಸ್ಸಾದ ಮಹಿಳೆಯೊಬ್ಬರು ವಾರಕ್ಕೊಮ್ಮೆ ಬರುತ್ತಾರೆ. ಅವರಿಗೆ ಏನಿಲ್ಲವೆಂದರೂ ಅರವತ್ತು ವರ್ಷಗಳಿರಬಹುದು.ಆದರೆ ಅವರ ಉತ್ಸಾಹ ,ಚುರುಕುತನ ನಮ್ಮನ್ನು ನಾಚುವಂತೆ ಮಾಡುತ್ತದೆ.ಟ್ರಿಂ ಆಗಿ ತಮ್ಮ ಟೊಯೋಟಾ ಕಾರಿನಲ್ಲಿ ಬಂದಿಳಿಯುವ ಇವರು ಮನೆಯೊಳಗೆ ಕಾಲಿಟ್ಟ ಒಂದೆರಡು ಗಂಟೆಗಳಲ್ಲಿ ಇಡೀ ಮನೆ ಶುಭ್ರವಾಗಿಬಿಡುತ್ತದೆ.ಕಿಚನ್, ಬಾತ್ ರೂಂ ,ಟಾಯ್ಲೆಟ್ ಗಳು, ಮನೆಯ ಎಲ್ಲಾ ಗಾಜಿನ ಬಾಗಿಲು, ಕಿಟಕಿಗಳು ಇವರ ಕೈಚಳಕದಿಂದ ಮಿರಿಮಿರಿ ಮಿನುಗುತ್ತವೆ. ಮನೆಯವರೊಡನೆ ನಗುನಗುತ್ತಾ, ಮಾತನಾಡುತ್ತಾ ಕೆಲಸವನ್ನು ಮುಗಿಸುತ್ತಾರೆ.ಇಲ್ಲಿನ ಜನರಲ್ಲಿ ಮಾಡುವ ಕೆಲಸದಲ್ಲಿ ಮೇಲು-ಕೀಳೆಂಬ ಮನೋಭಾವವಿಲ್ಲ.ಒಟ್ಟಿನಲ್ಲಿ ದುಡಿದು ತಿನ್ನಬೇಕೆಂಬ ನಿಯಮ ಅಷ್ಟೆ.ನನಗೆ ಇವರ ಕೆಲಸವನ್ನು ನೋಡಿದಾಗ ಕೆಲಸ ಯಾವುದಾದರೇನು, ಅದನ್ನು ಮನಸ್ಸಿಟ್ಟು ಶ್ರದ್ಧೆಯಿಂದ ಮಾಡುವುದು ಮುಖ್ಯ ಎಂಬ ನಮ್ಮ ಹಿರಿಯರ ನುಡಿ ನೆನಪಾಯಿತು.
ಸಾಮಾನ್ಯವಾಗಿ ಆಸ್ಟ್ರೇಲಿಯಾದ ಯಾವುದೇ "ದ್ವೀಪಗಳಲ್ಲಿ ಮತ್ತು ಪ್ರಾಣಿಧಾಮಗಳಲ್ಲಿ" ಸರಿಸೃಪಗಳದ್ದೇ ದರ್ಬಾರು ....!! ಇಲ್ಲಿ ಸರಿಸೃಪಗಳ ವಿವಿಧ ಜಾತಿಯ ಪ್ರಬೇಧಗಳನ್ನು ಜನರಿಗೆ ವೀಕ್ಷಿಸಲು ಇಟ್ಟಿರುವುದನ್ನು ಕಾಣಬಹುದು.ಇವೇ ಇಲ್ಲಿನ ಜನರ ಅದರಲ್ಲೂ ಮಕ್ಕಳಿಗೆ ಆಕರ್ಷಣೆಯ ಕೇಂದ್ರಗಳಾಗಿವೆ..! ಇವುಗಳನ್ನು ಕೈಯ್ಯಲ್ಲಿ ಹಿಡಿದು ಮುದ್ದಿಸುವುದನ್ನು ನೋಡಿದರೆ ಅಚ್ಚರಿಯಾಗುತ್ತದೆ....!? 
